Sveitarstjórn Borgarbyggðar samþykkti á fundi sínum á þriðjudag að ganga til samninga við Arnar rafvirkja ehf. og Sigur-garða ehf. um að skipta með sér verkþáttum í lýsingu upp samhliða veginum í fólkvanginn Einkunnir. Samtals er samningurinn að fjárhæð tæpar 53 milljónir króna og er verkið á fjárhagsáætlun ársins 2025.

Eins og fram kom í fréttum Skesshorns í vikunni felldi sveitarstjórn Borgarbyggðar tillögu um áðurnefndan samning þegar varafulltrúi Framsóknarflokksins, Þórður Brynjarsson, gekk til liðs við minnihluta sveitarstjórnar. Þá var þegar boðaður nýr fundur í sveitarstjórn með það eitt á dagskránni að taka mál þetta upp að nýju og afgreiða það. Sá fundur fór fram eins og áður sagði á þriðjudaginn. Nú var Framsóknarflokkurinn með fullskipað lið og eftirleikurinn því auðveldur.

Það bar hins vegar til tíðinda að fulltrúar minnihlutans óskuðu eftir upplýsingum um það hvort allir bæjarfulltrúar meirihlutans teldu sig hæfa til þess að taka þátt í afgreiðslu fundarins. Af því sköpuðust talsverðar umræður og eftir fyrirspurn úr röðum meirihlutans kom í ljós að þar átti minnihlutinn við bæjarfulltrúana Guðveigu Eyglóardóttur og Eðvar Ólaf Traustason sem eftir því sem fram kom á fundinum standa ásamt öðrum að rekstri gufubaðs í Einkunnum. Lýstu fulltrúar meirihlutans yfir vanþóknun sinni á málflutningi minnihlutans. Um síðir lagði Guðveig Eyglóardóttir forseti sveitarstjórnar það í hendur sveitarstjórnar að greiða atkvæði um hæfi sitt og Eðvars. Var hæfi þeirra beggja staðfest með fimm atkvæðum en fulltrúar minnihlutans sátu hjá.

Á fundinum lagði Sigurður Guðmundsson fulltrúi Sjálfstæðisflokksins í sveitarstjórn fram bókun fyrir hönd minnihlutans þar sem fram kom að framganga meirihlutans væri andstæð lýðræðislegum hefðum sem viðhafðar séu alla jafnan, það er að kosið sé um mál, niðurstaðan fengin og hún virt. „Að boða til aukafundar, með töluverðum kostnaði af skattfé, til þess eins að freista þess að fá niðurstöðu sem meirihlutanum er þóknanlegri, verð ég að segja gróft dæmi um frekjugang eða óhemjugang,“ segir meðal annars orðrétt í bókun minnihlutans.

Eftir nokkrar umræður var gengið til atkvæða og var samþykkt að ganga til áðurnefndra samninga með fimm atkvæðum gegn fjórum.

Sveitarstjórn Borgarbyggðar samþykkti áður felldan verksamning