Njarðvík hafði betur gegn nýliðum ÍA í Bónus deild karla í körfunni í framlengdum leik sem spilaður var við Vesturgötuna í gærkvöldi. Fullt var á pöllunum og fengu áhorfendur sannkallaða stigaveislu í ljósi þess að leikurinn endaði 130-119.

Liðin skiptust á um að leiða í leiknum og áttu bæði ágæta kafla. Útlendingarnir í liða Skagamanna röðuðu inn stigum, settu frá 29 til 34 hver, en heimastrákarnir náðu ekki sama flugi og í leiknum gegn Þór í upphafi móts. Líklega mun Óskar þjálfari brýna útlendingana með samspilið og nýta hæfileika ungu strákanna, sem fengu fáar sendingar þrátt fyrir að koma sér vel fyrir í álitlegum skotstöðum. En hvað sem því líður voru Skagamenn að standa sig vel og eftir venjulegan leiktíma var jafnt á með liðunum 109-109. Í ljósi þess að jafntefli er ekki viðurkennd úrslit í körfubolta var framlengt um fimm mínútur. Þá voru það gestirnir sem einfaldlega voru miklu sterkari og niðurstaðan því sanngjörn.

Karfan.is spjallaði við Óskar Þorsteinsson þjálfara ÍA eftir leikinn. Hann sagði að það hafi verið súrt að tapa þessu svona í blálokin, en þeir hafi sýnt hörkuleik í venjulegum leiktíma. „Við vissum að þetta yrði erfiður leikur en stóðum okkur vel lengst af. Í framlegningunni klúðruðum við þessu sjálfur, gerðum afdrifaríka feila; það vantaði skipulagið sóknarlega og orkuna í vörninni,“ sagði Óskar. Hann vonast til að næsti heimaleikur verði í nýja íþróttahúsinu við Jaðarsbakka og segist treysta því að áhorfendur fylli á pallana þar eins og þeir hafa gert í þessum tveimur heimaleikjum sem búnir eru í haust.

Eftir umferðina eru KR og Grindavík á toppi deildarinnar með sex stig, en Skagamenn í neðri hlutanum með tvö. Einungis Þór Þorlákshöfn og Ármann eru á botninum án stiga.

AvAir höllin tekur við

Næsti leikur ÍA er heimaleikur gegn Álftanesi. Í ljósi þess að nú er búið að halda fleiri en einn kveðjuleik á Vesturgötunni er nú stefnt á að leikurinn eftir viku verði spilaður í AvAir höllinni við Jaðarsbakka föstudaginn 24. október kl. 19:30. Formleg vígsla hússins er hins vegar ráðgerð laugardaginn 1. nóvember.

Í júní í sumar gerði Körfuknattleiksfélag ÍA samning við AvAir um að gerast aðalstyrktaraðili liðsins. Samhliða því mun keppnishús félagsins bera nafn fyrirtækisins. AvAir er bandarískt fyrirtæki með alþjóðlega starfsemi og leiðandi aðili á heimsvísu í viðskiptum með flugvélavarahluti. Fyrirtækið þjónustar þúsundir viðskiptavina um heim allan. Framkvæmdastjóri AvAir fyrir Evrópu, Mið-Austurlönd og Afríku er Skagamaðurinn Fjalar Scott.

Skagamenn áttu góðan leik í venjulegum leiktíma en súrt tap var niðurstaðan