Embætti biskups Íslands lýsir vonbrigðum með þá tillögu fjármálaráðherra að sóknargjöld á næsta ári verði um eitt þúsund krónur. Gerir embættið athugasemdir við það verklag að ákveða sóknargjöld með tímabundnu ákvæði 17. árið í röð.

Þetta kemur fram í umsögn um frumvarp til breytinga á ýmsum lögum vegna fjárlaga fyrir árið 2026, sem embættið sendi efnahags- og viðskiptanefnd Alþingis. Í umsögninni kemur fram að í lögum um sóknargjöld sé gert ráð fyrir að upphæð sóknargjalda fylgi vísitölu launa en eftir efnahagsáföllin 2008 samþykkti Alþingi tímabundið ákvæði í þeim lögum sem lækkaði þá tölu. Á hverju ári síðan hafa sóknargjöld verið ákveðin með tímabundnu ákvæði. Væri tímabundna ákvæðið ekki nýtt væru sóknargjöldin nærri þrjú þúsund krónur en þess í stað leggur fjármálaráðherra nú til að þau verði um eitt þúsund krónur eins og áður sagði.

„Í 16 ár hafa sóknir landsins mátt þola skerðingu á framlagi ríkisins til þeirra. Nú nemur skerðingin um 60%. Uppreiknað nemur skerðingin tveimur milljörðum á hverju ári í 16 ár. Samtals eru það rúmir 20 milljarðar sem sóknir landsins hefðu átt að fá greitt skv. lögum um sóknargjöld, en hafa ekki fengið,“ segir orðrétt í umsögn embættis biskups.

Þá kemur fram að sóknargjöldum sé ætlað að fjármagna einna helst tvo útgjaldaliði. Annars vegar viðhald kirkjubygginga en um 350 kirkjubyggingar tilheyra sóknum landsins. Skerðing sóknargjalda hafi valdið verulegri viðhaldsskuld og eru rakin um það dæmi í umsögninni. Hins vegar er sóknargjöldum ætlað að fjármagna tónlist og kirkjustarf í sóknum landsins. Má þar nefna að kirkjukórar, laun organista, kaup á hljóðfærum, kirkjustarf, barna- og unglingastarf sé að öllu leyti fjármagnað af sóknunum sjálfum og sóknargjöldin séu eina tekjulind flestra sókna.

Einnig er nefnt í umsögninni að ekki sé kunnugt um að nokkur önnur útgjöld ríkisins séu kerfisbundið ákveðin með tímabundnum ákvæðum eins og sóknargjöld hafa verið ákveðin frá árinu 2008. Að fjármálaráðherra velji að leggja til 7% lækkun á milli ára ofan á 5% verðbólgu séu veruleg vonbrigði. Er það því einlæg ósk embættis biskups að Alþingi endurskoði þessa tillögu ráðherra annað hvort með því að bæta ekki við sautjánda tímabundna ákvæðinu eða hækki krónutöluna umtalsvert.

Fjárhæð sóknargjalda veldur embætti biskups vonbrigðum