Rætt við Valdísi Ósk Margrétardóttur formann FKA á Vesturlandi

Félag kvenna í atvinnulífinu á Vesturlandi (FKA) er vettvangur fyrir konur í landshlutanum, er sjálfstæð deild frá FKA á landsvísu. Starfsemi FKA Vesturlands hófst árið 2018 og var stofnfundur haldinn í Stykkishólmi. Aðalfundur FKA var haldinn á Hótel Vesturlandi í Borgarnesi í ágúst síðastliðnum. Þar var Valdís Ósk Margrétardóttir, framreiðslumaður og eigandi Viðburðaþjóna slf., kosin nýr formaður félagsins. Aðrar stjórnarkonur eru Dr. Eyrún Eyþórsdóttir grænmetisbóndi á Mýrum sem er ritari, Gyða Steinsdóttir fjármála- og skrifstofustjóri í Stykkishólmi er gjaldkeri og meðstjórnandi er Steinunn Helgadóttir framkvæmdastjóri í Stykkishólmi.

Vel skipulögð

Valdís Ósk nýr formaður félagsins leit við á ritstjórn Skessuhorns í liðinni viku til að segja lítið eitt frá sér og starfi félagsins. „Ég er ættuð frá Akranesi en flutti hingað fyrst fyrir þremur árum ásamt fjölskyldunni en við höfðum áður búið í Kórahverfinu í Kópavogi. Ég á og rek fyrirtækið Viðburðaþjóna slf. en þar hjálpa ég fólki að skipuleggja viðburði á borð við brúðkaup, árshátíðir og ráðstefnur. Þá starfa ég einnig sem veitingastjóri hjá Lúx veitingum, sem er með stærstu og flottustu veitingaþjónustum á landinu. Það er því mikið að gera að samþætta eigin rekstur og samhliða því að vera með stóra fjölskyldu. Ég er skipulögð þannig að þetta gengur.“

Örlagaár í okkar lífi

Fyrst eftir flutninginn á Akranes starfaði Valdís um tíma í félagsstarfi eldri borgara á Akranesi og sá m.a. um að framreiða mat sem eldaður er á Höfða en er í boði í hádeginu fyrir eldra fólk á Dalbraut 4. „Eftir að ég stofnaði fyrirtækið mitt varð strax mikið að gera á þeim vettvangi og varð ég á endanum að gefa eftir starfið á Akranesi,“ segir Valdís Ósk. „Það var eiginlega mikið örlagaár í mínu lífi fyrir þremur árum. Þá stofna ég fyrirtækið mitt, við hjónin kaupum okkur hús á Akranesi og flytjum í það með strákana okkar þrjá sem eru 3, 5 og 12 ára gamlir. Tveir eru í leikskóla og sá elsti í Grundaskóla. Maðurinn minn er Sveinn Andri Stefánsson. Hann er ættaður frá Reykhólum og við ákveðum að fara svona milliveginn með að flytja á Skagann. Hann starfar hjá Trésmiðjunni Akri. Það hafa því allir nóg að gera,“ segir hún.

Frá aðafundi FKA sem haldinn var í ágúst. F.v. Sigríður Margrét Guðmundsdóttir félagskona, Eyrún ritari, Valdís formaður, Halldóra fráfarandi stjórnarkona, Sólveig Hallsteinsdóttir félagskona, Margrét Birna Kolbrúnardóttir félagskona, Alexandra Ýr fyrrum formaður og Þórey Hafliðadóttir úr aðalstjórn FKA sem mætti ásamt Andreu Róbertsdóttur framkvæmdastjóra FKA. Á myndina vantar stjórnarkonurnar Steinunni og Gyðu. Ljósm. Andrea Róbertsdóttir.

Margt framundan

Valdís Ósk fer ekki dult með að miklu betra sé að ala upp börn á Akranesi miðað við á höfuðborgarsvæðinu. „Það er himinn og haf þar á milli. Hér er miklu rólegra og fjölskylduvænna umhverfi fyrir börn og fjölskyldur; minna stress og hér höfum við byggt okkur upp yndislegt líf.“ Valdís segist hafa gengið í raðir Félags kvenna í atvinnulífinu á Vesturlandi fyrir tveimur árum. Var strax kosin ritari stjórnar en formaður á fundi í ágúst síðastliðnum. Blaðamaður spyr hvernig sé að vera þátttakandi í svona félagi eins og FKA. „Það er ótrúlega flottar konur í þessu félagi okkar hér á Vesturlandi. Það hefur reynst mér ótrúlega vel sem 34 ára konu sem nýflutt er á svæðið að geta leitað til vinkvenna í félaginu til að fræðast um allt mögulegt. Ég frétti af félaginu og skráði mig í það án þess að þekkja eina konu í því áður. Svo mætir maður á viðburði og kynnist strax hinum konunum. Nú er stefna okkar í nýrri stjórn að efla tengslanetið. Í því sambandi erum við búnar að skipuleggja nokkra viðburði á næstunni. Við ætlum til dæmis að mæta hjá Bryndísi Guðmundsdóttur á Miðhrauni á Snæfellsnesi í kvöldstund föstudaginn 24. október næstkomandi, í mat og samveru. Þangað mega félagskonur taka með vinkonur sínar jafnvel þótt þær séu ekki í félaginu. Þar verður farið ítarlega yfir starfið í vetur. Þá stefnum við á jólarölt á Akranesi 13. nóvember þar sem við heimsækjum konur sem eru að reka verslanir hér, kaupum jólagjafir og höfum það huggulegt saman. Þá er búið að ákveða golfmótsheldi á Vesturlandi 22.-24. maí í vor. Loks munu Suðurnesjakonur í FKA mæta í sólarhringsheimsókn eftir áramót.“

Litið upp til baráttujaxlanna

Aðspurð segir Valdís Ósk að á fimmta tug kvenna sé í FKA á Vesturlandi og er markmiðið að fjölga í hópnum. „Við leggjum áherslu á að félagskonur þurfa ekki sjálfar að eiga eða stjórna fyrirtæki til að geta gerst félagar í FKA. Þetta geta því verið konur á ýmsum stöðum í fyrirtækjum, hvort sem þær eru bókarar, framkvæmdastjórar eða gegna öðrum störfum. Fyrst og fremst er félagið til að efla tengsl og kynnast öðrum. Við lítum einnig upp til kvenna sem náð hafa langt í sínu starfi og get ég alveg nefnt Gerði í Blush sem dæmi um slíkan baráttujaxl. Það er því okkar stefna að virkja félagskonur og efla enn frekar skemmtilegan félagsskap.“ Valdís Ósk segir að best sé að leita upplýsinga um félagsskapinn með að fara á heimasíðu FKA.is. Þar er hægt að sjá alla viðburði félaganna, sjá hverjar eru í forsvari fyrir þau og sækja um aðild. Greitt er eitt félagsgjald yfir árið.

**Valdís Ósk rekur Viðburðaþjóna þar sem skipulagðar eru veislur stórar sem smáar.**

Kletturinn í lífinu

Sjálf segist Valdís koma úr lítilli en samheldinni fjölskyldu. Móðir hennar er Elín Margrét Jóhannsdóttir sem nú starfar í félagsstarfi eldri borgara á Akranesi, en hún býr einnig á Akranesi. Móðurafi hennar var Jóhann Þorsteinsson, oft kallaður Jói vakri, sem margir þekkja úr hrossaræktinni. Hann var lengst af búsettur á Miðsitju í Skagafirði. „Ég ætlaði alltaf að verða bóndakona þegar ég var lítil. Er eina barnabarn afa sem fékk áhuga fyrir hestamennsku og stundaði hana þar til barneignir og verkefnið að stofna fjölskyldu tók yfir allan lausan tíma. En hestamennskan verður örugglega endurvakin síðar,“ segir hún. Valdís Ósk segir að árið 2013 hafi reynst henni og fjölskyldunni erfitt. „Við vorum tvö systkinin. Ég missi bróður minn Helga Rafn 12. nóvember árið 2013, en í janúar sama ár hafði elsti sonur minn komið í heiminn. Fráfall bróður míns var mér mikið áfall og fékk ég góða aðstoð við að vinna úr því. Þá hafa mamma mín og ég staðið þétt saman og aðstoðað hvor aðra. Hún er kletturinn minn og báðar búum við nú á Akranesi, styðjum hvor aðra nú sem fyrr,“ segir Valdís Ósk að endingu.

Frábær félagsskapur til að styrkja tengslanetið

Rætt við Valdísi Ósk Margrétardóttur formann FKA á Vesturlandi

Rætt við Valdísi Ósk Margrétardóttur formann FKA á Vesturlandi