Á fundi sveitarstjórnar Dalabyggðar í síðustu viku var lögð fram áskorun frá íbúum Skógarstrandar og eigendum jarða á Skógarströnd vegna sameiningarviðræðna sveitarfélagsins við Húnaþing vestra. Eins og áður hefur komið fram í Skessuhorni munu íbúakosningar um áðurnefnda sameiningu fara fram 28.nóvember til 13.desember n..k.

Í áskorun íbúanna er rifjuð upp forsaga þess að Skógarstrandarhreppur sameinaðist Dalabyggð þann 1.janúar 1998 en þá bjuggu í hreppnum innan við 50 manns. Stjórnvöld höfðu lagt hart að minni sveitarfélögum að sameinast þar sem þjónusta hafði verið flutt frá ríki til sveitarfélaga sem gat gert minni sveitarfélögum erfitt fyrir að standa undir þeirri þjónustu að því er kemur fram í áskoruninni.

Þá kemur fram að á þeim tíma hafi legið beint fyrir Skógarströnd að sameinast nærliggjandi sveitarfélögum en þau voru Dalabyggð, Kolbeinsstaðahreppur og Helgafellssveit. Á endanum hafi Kolbeinsstaðahreppur sameinast Borgarbyggð. Ef til frekari sameiningar kæmi síðar fyrir Dalabyggð yrði eðlilegt að horft yrði til sameiningar í vesturátt á Snæfellsnes enda höfðu Skógstrendingar sótt mikið þjónustu til Stykkishólms. Á endanum hefði hins vegar sameining við Dalabyggð orðið að veruleika.

Í áskoruninni kemur fram að Skógarstrandarhreppur hafi staðið fjárhagslega sterkt á þessum tíma og hafi því komið inn í Dalabyggð með ágætis heimamund. Svæðið sem um ræðir nær frá Álftafirði í vestri að Gljúfurá í austri og alls eru 22 jarðir innan svæðisins og nokkrir sjálfstæðir eyjaklasar. Þá segir að í skoðanakönnun sem framkvæmd var árið 2021 meðal íbúa Dalabyggðar um mögulega sameiningarkosti var fyrsti kostur íbúa Dalir, Stykkishólmur og Helgafellssveit enda hafi Stykkishólmur og Helgafellssveit síðar sameinast í Sveitarfélagið Stykkishólm.

Þá kemur fram að frá 1998 hafi orðið mikil breyting á búsetu á Skógarströnd og mikil uppbygging átt sér stað og í dag sé þar blandaður rekstur, sauðfjártækt, kúabú, skógrækt, hótelrekstur og æðardúnsrækt. Á svæðinu sé blönduð búseta margra íbúa sem eiga lögheimili á höfuðborgarsvæðinu en dvelja langdvölum á jörðum sínum á Skógarströndinni. Af þessum eignum njóti Dalabyggð góðs af enda séu há fasteignagjöld greidd til sveitarfélagsins en þjónusta við þessa íbúa sé afar takmörkuð og helst í formi sorphirðu að því er kemur fram í áskoruninni. Þess vegna sé eðlilegt að einnig sé hlustað á raddir þessara aðila.

Bæði íbúar sem lögheimili eiga á Skógarströndinni og eigendur jarða og eyja sem hafa hlutabúsetu þar séu sammála um að skora á Dalabyggð að hlusta á óskir íbúa um, að ef til sameiningr komi, að horfa í vesturátt og taka upp viðræður við Stykkishólm. „Enda eiga Skógstrendingar sem ekki eru með fasta búsetu margir hverjir rætur að rekja til Stykkishólms“ segir orðrétt í áskoruninni.

Þá segir að ef af sameiningu verði milli Dalabyggðar og Húnaþings vestra þá óski Skógstrendingar þess, að hlustað verði á óskir íbúa og að samningsaðilar skuldbindi sig til að hefja viðræður við Sveitarfélagið Stykkishólm um breytingar á landamerkjum sveitarfélaganna sem geri Skógstrendingum mögulegt að sameinast Stykkihólmi. Er lagt til að landamerkin miðist við upprunaleg landamerki hreppsins við Gjúfurá.

Eins og fram hefur komið í frétt Skessuhorns hafa íbúar á Skógarströnd hrundið af stað undirskrifarsöfnun til stuðnings sameiningu við Stykkishólm.

Íbúar á Skógarströnd sendu sveitarstjórn Dalabyggðar áskorun