Um liðna helgi kom hópur fólks saman við Ólafsvíkurrétt og vann við lokafrágang gömlu réttarinnar. TS vélaleiga kom með fínt efni sem dreift var í dilka og almenning réttarinnar. Hópur fólks tók svo þátt í að dreifa úr mölinni og moka að veggjunum.

Með því að smella myndavélinni á QR kóða á staur við réttarvegginn má kalla fram upplýsingar um réttina. Þar segir: „Gamla fjárréttin í Ólafsvík hefur að öllum líkindum verið notuð og bætt við hana dilkum eftir þörfum, frá upphafi byggðar í Ólafsvík. Eitthvað um 1960 var hún lögð af. Áhugahópur um gömlu réttina var stofnaður 29. ágúst 2014 undir forystu Guðrúnar Tryggvadóttur. Hleðslumeistari var Ari Óskar Jóhannesson.“ Þá er vakin athygli á FB síðu sem áhugahópurinn heldur úti; „Ólafsvíkurrétt.“ Þar er hægt að skoða fjölda ljósmynda frá endurhleðslu réttarinnar.

Þetta smekklega skilti er nú við innganginn þar sem sést að vinna við að endurhlaða réttina stóð yfir árin 2014 til 2023. Þá er merki með QR kóða sem vísar fólki leið inn á nánari upplýsingar um réttina og hverjir voru skráðir fyrir dilkunum þegar réttin var síðast notuð.

Lauk að stórum hluta fyrir tveimur árum

Í ágústmánuði fyrir tveimur árum var lokið við að endurhlaða réttina en unnið hafði verið við verkið með hléum í tæpan áratug. Í viðtali sem birtist við Guðrúnu Tryggvadóttur í Ólafsvík, frumkvöðul að verkinu, í Skessuhorni haustið 2014 sagði hún meðal annars: „Þetta er ákaflega fallegt svæði uppi í Krókabrekkunum hérna við Ólafsvík þar sem gamla réttin er. Ég held það séu margir sem hafa áhuga og vilja taka þátt í endurgerð gömlu réttarinnar. Það sem þarf er að einhverjir ýti þessu af stað. Við gerum okkur alveg grein fyrir því að þetta er mikil vinna.“ Þetta sagði Guðrún fyrir ellefu árum, en hún stóð haustið 2014 fyrir fundi í Átthagastofu Snæfellsbæjar þar sem fjallað var um endurgerð gömlu Ólafsvíkurréttarinnar, verkefnið kynnt og því aflað stuðnings. Guðrún hafði misserin áður undirbúið jarðveginn fyrir þetta verkefni. Sótti hún m.a. um leyfi Minjastofnunar fyrir því að endurbyggja fjárréttina og fá fyrsta styrkinn sem rann til verkefnisins.

**Hópur sem komið hafði að endurgerð réttarinnar, en myndin var tekin haustið 2023.**

Fjár var smám saman aflað í verkefnið. Hefur því þannig undið fram þau ellefu ár sem það hefur staðið yfir. Eins og fyrr segir var lokið við hleðslu Ólafsvíkurréttar fyrir tveimur árum. Þá var ein af meðfylgjandi myndum tekin af hópnum sem hafði síðustu tvö ár tekið þátt í hleðslunni. Nú geta gestir og komandi kynslóðir notið þess forna handverks og verklags sem tíðkaðist á árum áður. Verkefnið var fjárfrekt og þegar upp var staðið voru ýmis fyrirtæki, samtök og einstaklingar sem lögðu því lið. Nú er endurrisið glæsilegt mannvirki sem samfélagið í Ólafsvík getur verið afar stolt af.

Lokafrágangur um helgina við Ólafsvíkurrétt