Bæjarstjórn Grundarfjarðarbæjar lýsir yfir verulegum áhyggjum af því að reglugerð um skelbætur hafi ekki verið gefin út og leggur þunga áherslu á að úr því verði bætt án tafar. Þetta kemur fram í samþykkt bæjarstjórnar á fundi hennar í síðustu viku.

Eins og fram hefur komið í fréttum Skessuhorns hefur Eyjólfur Ármannsson innviðaráðherra frestað útgáfu reglugerða sem eru grunnurinn að úthlutun veiðiheimilda m.a. skelbóta, byggðakvóta og línuívilnunar og hefur ráðherra vísað til þess að nú standi yfir stefnumótunarvinna í samráði við hagsmunaaðila vegna þessara veiðiheimilda. Fram hafa komið áhyggjur innan sjávarútvegsins að ætlun ráðherra sé að færa hluta eða allar áðurnefndar aflaheimildir til strandveiða og auka með því líkur á því að hægt verði að standa við kosningaloforð Flokks fólksins um 48 daga strandveiðar.

Í áðurnefndri samþykkt bæjarstjórnar Grundarfjarðarbæjar kemur fram að ekkert samráð hafi átt sér stað við sveitarfélagið vegna stefnumörkunar innviðaráðherra og þeirra tafa sem í kjölfarið hafa orðið á útgáfu framangreindra heimilda. Þá segir að stefnumörkunarvinna ráðherra hafi leitt af sér bið og mikla óvissu hjá þeim fyrirtækjum sem hafa á undanförnum árum fengið úthlutað skel- og rækjubótum sem og byggðakvóta. Úthlutun þessi hafi um árabil skipt atvinnulíf og samfélag í Grundarfirði miklu máli. Sjávarútvegur sé hryggjarstykkið í atvinnulífi Grundarfjarðar og langstærsti hluti útsvarstekna sveitarfélagsins komi frá veiðum og vinnslu sjávarafurða. Fyrirsjáanleiki sé lykilatriði þegar kemur að starfsemi og úthlutun veiðiheimilda. Með þvi að skerða eða afnema skelbætur og byggðakvóta sé verið að veikja rekstrargrundvöll þeirrar starfsemi sem fram fari í Grundarfirði sem og bæjarsjóðs og samfélagsins þar með.

Bæjarstjórn vísar einnig í samþykkt sinni til forsögunnar. Orðrétt segir í samþykktinni: „Bæjarstjórn telur rétt að árétta sögulega tilkomu skelbóta, þegar fyrirtæki við Breiðafjörð afsöluðu sér varanlegum aflaheimildum í staðinn fyrir skelkvóta; staðreynd sem ekki má horfa framhjá við ráðstöfun heimildanna nú.“

Ekkert samráð ráðherra við Grundarfjarðarbæ vegna skelbóta