Fagna menningarlegri fjölbreytni

Félag nýrra Íslendinga mun halda Þjóðahátíð Vesturlands (Festival of Nations West Iceland) sunnudaginn 26. október frá klukkan 14:00 til 17:00 í Íþróttahúsinu við Vesturgötu á Akranesi. „Þessi hátíð fagnar fjölbreytileika menningar á Íslandi og býður upp á líflega dagskrá með fjölhæfum listamönnum sem koma frá ýmsum löndum. Meðal annars má nefna tónlistarflutning, hefðbundinn taílenskan dans með Tintrinai Thikhasuk, indverskan dans frá Bollywood Iceland, brasilískan Zouk dans frá Celina & Karol Zouk, íslenskan þjóðdans með Þjóðdansafélagi Reykjavíkur, búlgarskan dans frá Hop Trop og kraftmikla sýningu frá Iceland Cheer. Þetta er þó einungis hluti af úrvalinu,“ segir í tilkynningu.

Gestir á hátíðinni munu fá tækifæri til að smakka mat frá yfir 30 löndum, þar á meðal Afganistan, Argentínu, Kína, Kólumbíu, Indlandi, Ítalíu, Nígeríu, Póllandi, Rúmeníu, Serbíu, Spáni, Suður-Afríku og Úkraínu, svo fátt eitt sé nefnt. Handverk og hefðbundinn klæðnaður, auk vara úr nærliggjandi verslunum verða til sýnis og sölu.

„Þjóðahátíð Vesturlands hefur verið haldin árlega síðan 2006 og er hún mikilvægur vettvangur til að efla skilning, stuðla að samveru ólíkra menningarheima og vinna gegn kynþáttafordómum á Íslandi. Hátíðin veitir börnum innflytjenda tækifæri til að fagna og deila arfleifð foreldra sinna, auk þess sem Íslendingar geta kynnt sína menningu fyrir nýjum íbúum landsins, sem stuðlar að þroskandi menningarsamskiptum. Aðgangur er ókeypis og allir eru hjartanlega velkomnir.“

Meðfylgjandi eru tvær myndir frá Þjóðahátíðum fyrri ára á Vesturlandi úr safni Skessuhorns.

Þjóðahátíð Vesturlands framundan á Akranesi

Fagna menningarlegri fjölbreytni

Fagna menningarlegri fjölbreytni