Varaslökkviliðsstjóri Borgarbyggðar hefur með bréfi til sveitarstjórnar Eyja- og Miklaholtshrepps ítrekað óskir Slökkviliðs Borgarbyggðar um að ráðast í framkvæmdir sem tryggi öflun á tryggu slökkvivatni í sveitarfélaginu. Þetta kemur fram í bréfi sem Bjarni Kristinn Þorsteinsson varaslökkviliðsstjórinn sendi hreppsnefndinni.

Slökkvilið Borgarbyggðar hefur sinnt Eyja- og Miklaholtshreppi um árabil eða síðan Brunavarnir Heiðsynninga voru lagðar niður en að því félagi stóðu Borgarbyggð og Eyja- og Miklaholtshreppur. Af bréfi Bjarna má ráða að allt frá árinu 2017 hafi Slökkvilið Borgarbyggðar óskað eftir því að ráðist yrði í framkvæmdir til; „að tryggja öruggt aðgengi að slökkvivatni með uppsetningu brunahana við Vegamót sem tengdur yrði inn á stofnlögnina ofan úr Hjarðarfellshlíð. Hreppsnefndin sá sér ekki fært að verða við þeirri bón að tryggja aðgengi slökkviliðs að tryggu slökkvivatni í hreppnum eins furðulega og það hljómar,“ segir orðrétt í bréfinu. Nefnir Bjarni að byggingum hafi á síðustu árum fjölgað mjög í sveitarfélaginu og nefnir að kynntar hafi verið framkvæmdir á jörðinni Laxárbakka; „sem eiga sér fáar hliðstæður“.

Hvetur varaslökkviliðsstjórinn þessu næst sveitarstjórnina til þess að huga að þessum málum að nýju og bendir á að ekki sé um skort á vatni að ræða hvort heldur er að sumri eða vetri heldur þurfi einungis að ráðast í nauðsynlegar framkvæmdir til þess að tryggja aðgengi að því. Eftir sem áður verði slökkvivatn flutt að brunastað með tankbílum hverju sinni en slökkvilið þurfi að hafa trygga og góða leið að vatninu án mikillar fyrirhafnar.

Sveitarstjórn Eyja- og Miklaholtshrepps tók málið fyrir og samþykkti að fela oddvita að vinna málið áfram í samstarfi við Slökkvilið Borgarbyggðar. Einnig ræddi sveitarstjórnin um brunavarnarátak innan sveitarfélagsins og var oddvita falið að vinna tillögu að átaki í þeim efnum.

Áhyggjur slökkviliðs af aðgengi að vatni