Rætt við nýja eigendur að Hótel Borgarnesi

Hótel Borgarnes stendur við Egilsgötu 11 í Borgarnesi og þar á ferðaþjónusta sér langa sögu. Nýir eigendur hafa nú tekið við rekstrinum, hjónin Lína Móey Bjarnadóttir og Sigurður Karlsson. Blaðamaður Skessuhorns settist um stund niður með þeim á skrifstofunni til að taka stöðuna.

Ýmis tengsl við svæðið

Þau koma bæði af höfuðborgarsvæðinu og hafa nú flutt búferlum í Borgarnes. Lína Móey er reyndar ættuð þaðan og á sterk tengsl við Borgarfjörðinn, hún er dótturdóttir Péturs Geirssonar sem hefur um áratugaskeið átt og rekið hótelið. Sigurður er hins vegar fæddur á Djúpavogi og er ættaður af þeim slóðum, en átti um tíma heima á Sauðárkróki. „Við höfum bæði mikla reynslu af ýmiss konar rekstri,“ segja þau. „En höfum ekki áður komið að því að reka hótel, svo við erum að læra.“ Blaðamaður spyr nánar um tildrög þess að þau ákváðu að kaupa langstærstan hlut í Hótel Borgarnesi og flytja á staðinn. „Hótelið var áður að mestu í eigu fjölskyldunnar og byggði á mjög góðum grunni,“ segir Lína. „Við höfðum verið að leita fyrir okkur um kaup á fyrirtæki og þegar þetta kom upp vorum við reiðubúin að takast á við það.“ Hlutirnir hafa gerst hratt síðan fyrst var rætt um þetta í janúar á þessu ári. Þau höfðu keypt húseign á Selfossi árið áður og voru flutt þangað. En í febrúar í ár voru þau mætt í Borgarnes.

**Setustofa hótelsins er búin þægilegum húsgögnum.**

Sófi það sama og herbergi

Sigurður býr bæði að reynslu og þekkingu sem gagnast í þessu nýja verkefni. Hann var til að mynda framkvæmdastjóri 10-11 verslananna um langt skeið og var síðast framkvæmdastjóri hjá Ilvu. Reyndar hefur hann sinnt síðarnefnda starfinu samhliða hótelrekstrinum undanfarna mánuði. „Ég var hjá 10-11 í um tuttugu ár,“ segir hann. „Endaði þar sem framkvæmdastjóri í öllum búðunum. Kláraði svo meistaranám í reikningshaldi og endurskoðun og fór að vinna hjá endurskoðunarfyrirtækinu EY sem áður var Ernst & Young. Svo fór ég þaðan til Ilvu.“ Samhliða öllu þessu kláraði hann MBA nám. Hann segir námið hafa komið sér vel og muni einnig verða gagnlegt í hótelrekstrinum. „Það er alveg sama hvort þú ert að selja sófa eða herbergi,“ segir hann. „Þetta snýst alltaf um að veita góða þjónustu; vera með vöru sem er í lagi og kynna hana vel.“

**Þennan fallega sal kannast margir Borgfirðingar við, enda vettvangur margra viðburða gegnum tíðina. Hér hefur verið dekkað fyrir gesti.**

Kunnugar slóðir

Lína Móey er viðskiptafræðingur frá HR og kemur heldur ekki sem nýgræðingur að borðinu. Hún er búin að vera lengi í eigin rekstri svo sem við að reka fasteignir með öllu því sem því tilheyrir, t.d. útleigu og viðhald. „Eftir að við kynntumst kom Sigurður inn í þann rekstur með mér,“ segir hún. „En svo tókum við þessa ákvörðun og sjáum hér fullt af tækifærum. Það þarf stundum að þora, annars gerist ekkert!“

Þau fluttu í Borgarnes með fjögur börn, þrjá stráka á grunnskólaaldri og dóttur á öðru ári. Allt hefur gengið vel og henni líður sjálfri vel á þessum kunnugu slóðum. „Ég bjó sem barn í Hreðavatnsskála og var í heimavist á Varmalandi í um tvö ár,“ segir hún. „Svo kom ég líka í Borgarnes og var að vinna ýmis störf hjá afa. Enda gerði ég mér grein fyrir því þegar ég var flutt að hér er fullt af fólki sem ég kannast við, sem er mjög gaman.“

**Kötturinn Nóra hefur tekið að sér embætti móttökustjóra á hótelinu og stendur sig vel.**

Borgarnes er vel staðsett

Nýir eigendur setja gjarnan svip á eldri rekstur, en þau segja bæði að hótelið hafi verið ótrúlega vel rekið í fjölda ára. „Það býr að góðum og tryggum viðskiptavinum,“ segir Sigurður. „Okkar markmið hefur verið að byggja á þeirri sögu sem hefur verið búin til hér og bæta við hana. Þar liggja tækifærin.“ Alls eru 78 herbergi á hótelinu sjálfu en í eigu þess eru einnig íbúðir og herbergi í gömlu Kaupfélagsbyggingunni sem er andspænis hótelinu. Þar eru um 30 gistieiningar, bæði íbúðir og herbergi. „Svo alls býr hótelið að ríflega hundrað einingum til útleigu,“ segja þau. Það veitir ekkert af, á sumrin væri allt í lagi að vera með um 30 herbergi til viðbótar því það er biðlisti hjá okkur á þeim tíma.“

Næsta sumar er allt fullbókað. Þau segja það vera styrkleika hvað Borgarnes er vel staðsett. „Bærinn er bara í klukkutíma fjarlægð frá Reykjavík og það tekur einn og hálfan tíma að aka hingað frá Keflavík. Snæfellsnesið liggur beint við okkur og við erum við veginn til Akureyrar. Svo má ekki gleyma allri náttúrufegurðinni sem Borgarfjörðurinn býr yfir, það eru ómetanleg gæði.“

***Fjölskyldan á góðri stund. F.v.: Silvía Stella, Baltasar Elí, Lína Móey, Sigurjón Snorri, Sólveig, Baltasar Logi, Sóley Lív og Sigurður.***

Gott að hlusta

Þau Lína Móey og Sigurður segja bæði að mikilvægt sé að ganga að rekstrinum af ákveðinni auðmýkt, hlusta og læra af þeim sem fyrir eru. „Sumarið hefur farið í að starfa á gólfinu og læra inn á þetta,“ segir Sigurður. „Það er nauðsynlegt til að sjá hvað er hægt að styrkja og bæta og greina tækifærin. Það þýðir ekkert að mæta á staðinn með miklar hugmyndir áður en maður setur sig vel inn í reksturinn eins og hann er fyrir. Enda hefur þetta gengið vel og margt hægt að læra af starfsfólkinu sem hefur staðið vaktina, sumt hvert í mjög langan tíma. Við höfum verið ótrúlega heppin með fólk og það er starfsfólk hjá okkur sem hefur unnið hér í meira en 20 ár. Það er gott að hlusta eftir áliti starfsmannanna sem best þekkja til þótt það sé auðvitað eðlilegt líka að hafa fyrirfram mótaðar hugmyndir í upphafi. En þegar þú sest í stólinn og byrjar að vinna á staðnum snúast fyrirætlanirnar oft á hvolf; það sem þú hefðir hugsað þér að gera á bara alls ekki við.“

Hótelbyggingin

Hótelbyggingin er í raun þrískipt og elsti hluti hennar sem hannaður var af Halldóri H. Jónssyni var byggður árið 1955, eftir bruna fyrri gististaðar þarna. „Afi segir mér að miðhlutinn sem næst var byggður hafi að mörgu leyti verið hugsaður sem félagsheimili fyrir samfélagið hérna,“ segir Lína Móey. „Þess vegna er þar stór samkomusalur sem kemur sér vel fyrir okkur að hafa þegar um stærri viðburði er að ræða.“ Nýjasti hlutinn var svo byggður árið 1995 og þá bættust við 32 herbergi. Hótelið keypti svo kaupfélagshúsið á móti árið 2015 og gerði það upp.

Gegnum tíðina hefur Pétur Geirsson verið öflugur þátttakandi í atvinnulífinu og ætíð mikill frumkvöðull. Upprunalega er hann menntaður mjólkurfræðingur, en sneri sér snemma að ýmiss konar rekstri. Nefna má að hann hefur bæði rekið Botnsskála og Hreðavatnsskála. Tengslin við Borgarnes eru sterk, þangað flutti hann fyrst með foreldrum sínum fimm ára gamall árið 1939 og þar er hann enn. „Afi er enn alltaf að fá hugmyndir og er alltaf með verkefni í gangi. Svo býr hann líka hér, hann fylgir eiginlega hótelinu,“ segir Lína Móey og brosir.

Mikilvægt að koma til móts við fólk

Einn styrkleika Hótels Borgarness er að þar er gott rými, einnig fyrir borðhald. „Við vorum í sumar með um 200 manns í mat eitt kvöldið,“ segir Sigurður. „Það eru ýmsar áskoranir á mestu annatímunum og oft eru hópar með sérþarfir í mat. Það er þá t.d. fólk með ólíka menningu miðað við það sem hér gerist. Við gerum okkar besta til að aðlaga okkur að því, og hér er búið að byggja upp góða þekkingu á því hvernig á að vinna með alla þessa hópa. Okkur telst til að í sumar höfum við verið með um 100 manns í mat á dag að meðaltali, mestmegnis hópa sem gista hér. Allt hefur þetta gengið vel þrátt fyrir álag og mismunandi aðstæður og þarfir gesta.“ Stundum vilja hópar jafnvel fá 3ja rétta máltíð á 40 mínútum og þá er það bara afgreitt og hefur gengið vel. Hvort hægt sé að koma inn af götunni og bóka borð spyr blaðamaður. „Já,“ segja þau. „Við erum opið veitingahús með a la Carte. Við leggjum mikið upp úr góðri þjónustu og kappkostum að bæta hana ef það er hægt með einhverju móti.“

Kostir gamla miðbæjarins

Að sumrinu má oft sjá allnokkrar rútur við Hótel Borgarnes og ferðamenn sjást mikið á rölti um gamla bæinn. „Það er gaman að fá fólk hingað niður eftir,“ segir Sigurður. „Það er jú hér sem miðbærinn er og hingað sækir fólk. Þess vegna þarf áfram að byggjast hér upp öflugur miðbæjarkjarni með margs konar þjónustu og afþreyingu. Það væri gaman að sjá enn meira í gangi í kringum hótelið. Hér eru t.d. nú þegar Barabar, Landámssetur, Kaffi Kyrrð og veitingastaðurinn í Englendingavík og við erum dugleg að vísa þangað. Svo eru hér ótrúlega fallegar gönguleiðir með ströndinni sem fólk nýtir sér í miklum mæli. Brákarey er mjög vinsæl, það væri hægt að hafa útsýnispall þar til að njóta norðurljósanna á veturna.“

Frjálsar kenndu margt

Það er ekki sjálfsagt að allt gangi vel þegar hjón með börn á ýmsum aldri flytja búferlum með skömmum fyrirvara. En Lína Móey og Sigurður láta mjög vel af því að vera komin í Borgarnes. „Það líður öllum meðlimum fjölskyldunnar vel hér,“ segja þau og láta mjög vel bæði af leikskóla og grunnskóla. „Við foreldrarnir erum mjög ánægð líka og hlökkum til að taka meiri þátt í samfélaginu.“ Lína Móey bætir við að Sigurður þekki fólk víða á landinu úr frjálsíþróttaheiminum og að það eigi líka við um Borgarnes. „Hann var frjálsíþróttastjarna,“ segir hún. Sigurður segist hafa æft frjálsar stíft þar til um 19 ára aldur. Hann bætir við að áður fyrr hafi verið svo öflugt starf í frjálsum í Borgarnesi og að hann sakni þess. „Frjálsar íþróttir voru alltaf stór hluti af uppeldinu mínu,“ segir hann. „Sumarið hjá foreldrum mínum fór í að keyra mig á mót. Svo þegar við fluttum á Sauðárkrók fór ég að æfa tugþraut með Jóni Arnari Magnússyni. Þetta var dýrmæt reynsla og hefur kennt mér ákveðinn aga sem ég hefði ekki viljað hafa farið á mis við. Sem krakki var ég örugglega ótrúlega ofvirkur, en þetta tók hugann algerlega. Ég hef til að mynda aldrei smakkað áfengi, það var einhvern veginn aldrei rúm fyrir það þegar það var mót um hverja einustu helgi.“

Lífið er gott

Eins og áður kom fram eru þau með fjögur börn í Borgarnesi, þrjá drengi frá fyrra hjónabandi Línu Móeyjar og litla dóttur sem þau eiga saman. Þau eiga svo sitt hvora uppkomnu dótturina sem báðar eru í námi, önnur í verkfræði og hin í læknisfræði. Þær eru báðar fluttar að heiman. Heimilislífið í Borgarnesi er gott, þau hafa bæði mikinn áhuga á útivist og Sigurður nýtur þess til að mynda að fara að veiða með strákunum þremur sem eru kraftmiklir og fjörugir. Þau eiga bústað í grennd við Borgarnes þar sem þau njóta samverunnar þegar tími gefst um helgar. „Svo erum við ótrúlega samrýmd í öllu sem við erum að gera,“ segir Lína Móey. „Mest gerum við með börnunum. Við erum til að mynda búin að fara upp á Grábrók og að Hreðavatni þar sem ég var sem lítil stelpa og það var mjög skemmtilegt.“

Blaðamaður hefur notið stundarinnar og þakkar fyrir áhugavert spjall við kraftmikið fólk sem þorir. Hótel Borgarnes er í góðum gír og það virðist bjart yfir framtíðinni.

**Veiðiferð: Baltasar Logi, Baltasar Elí og Sigurjón Snorri.**

**Sóley Lív á tröppum Borgarneskirkju.**

Fólk sem vill og þorir

Rætt við nýja eigendur að Hótel Borgarnesi

Rætt við nýja eigendur að Hótel Borgarnesi