Á aðalfundi Sæljóns, félags smábátaeigenda á Akranesi síðastliðinn föstudag, var samþykkt áskorun til Akraneskaupstaðar, Hvalfjarðarsveitar, Faxaflóahafna, Slysavarnarfélagsins Landsbjargar og nærsamfélagsins alls um að styðja við og efla Björgunarfélag Akraness í mikilvægu starfi þess fyrir sjófarendur á Faxaflóa.

„Við fráfall félaga okkar, Magnúsar Þórs Hafsteinssonar, erum við enn og aftur minnt á mikilvægi alls öryggis þeirra sem eru á sjó. Staðsetning öflugs björgunarskips á Akranesi, miðsvæðis við Faxaflóa, er mikilvægt öryggi fyrir alla sjófarendur sem um flóann fara og styttir viðbragðstíma. Aðalfundurinn þakkar félögum í Björgunarfélagi Akraness fyrir einstakt samstarf og fagmannlegt starf sveitarinnar.“