Formaður Verkalýðsfélags Akraness fagnar áformunum

Brim hf. hefur gert bindandi tilboð í kaup á öllum hlutabréfum í Lýsi hf. Kaupverðið er 30 milljarðar króna. Kaupin eru háð samþykki stjórna beggja félaganna, þ.e. hluthafafundar Brims og Lýsis hf. auk Samkeppniseftirlitsins. Samkvæmt tilkynningu til Kauphallarinnar mun kaupverðið greiðast að jöfnu með hlutafé í Brimi og í reiðufé. Verðið er miðað við dagslokagengi félagsins 23. september 2025, sem var 63 krónur á hlut. Frá heildarverðmæti hlutafjár dragast vaxtaberandi skuldir Lýsis hf., sem námu rúmum 5,2 milljörðum króna í lok júní síðastliðins. Í tilkynningu Brims kemur fram að mikil tækifæri felist í samlegð og vexti. Kaupin styrki hráefnisstöðu Lýsis og færi Brim lengra upp virðiskeðju sjávarafurða.

Fagnar tíðindunum

Ef af þessum viðskiptum er um stórfrétt að ræða í íslenskum sjávarútvegi. Vilhjálmur Birgisson formaður Verkalýðsfélags Akraness fagnar tíðindunum og segir þau boða gott fyrir atvinnulíf á Akranesi. „Sem Akurnesingur sé ég þessi kaup sem mikið sóknarfæri fyrir bæjarfélagið okkar. Lýsi hf. á gríðarlega mikilvæga starfsemi hér á Akranesi í gegnum dótturfyrirtækið Akraborg, sem vinnur úr þorsklifur og framleiðir niðursoðnar afurðir sem þekktar eru um allan heim. Með kaupum Brims á Lýsi verður hráefnið betur tryggt, enda er um að ræða þorsklifur sem kemur beint af skipum Brims. Það skapar sterkan og stöðugan grunn fyrir áframhaldandi starfsemi Akraborgar og bætir um leið verðmætasköpun fyrir allt fyrirtækið. Þetta er líka einstakt tækifæri fyrir Brim til að efla enn frekar fullnýtingu á afurðum sínum. Með því að tengja saman veiðar, vinnslu og framleiðslu á hágæða afurðum eykst virði hráefnisins, og það er sú leið sem framtíðin kallar á. Við megum ekki gleyma því að bæði Akraborg og Vignir G. Jónsson eru gríðarlega flott og vel rekin fyrirtæki hér á Akranesi. Þau hafa byggt upp sterka sérstöðu og sannað að hér er til staðar þekking, gæði og metnaður sem stenst alþjóðlega samkeppni.“

Vilhjálmur kveðst vel trúa því að Guðmundur Kristjánsson muni efla þessa vinnslu enn frekar á Akranesi. „Guðmund tel ég einn af farsælustu og framsýnustu útgerðarmönnum landsins, með skýra sýn á að auka verðmætasköpun úr íslenskum sjávarafurðum. Hann hefur einnig sýnt að hann býr yfir sterkri samfélagslegri ábyrgð gagnvart nærsamfélögum, þar sem hann leggur áherslu á að byggja upp öfluga starfsemi sem nýtist bæði starfsmönnum, fjölskyldum þeirra og sveitarfélaginu í heild. Þessi samruni er því ekki aðeins viðskiptafrétt heldur gleðifrétt fyrir Akranes. Hún felur í sér ný tækifæri fyrir bæinn okkar, tryggir áframhaldandi starfsemi Akraborgar, styrkir stöðu Akraness sem vinnslustaðar í fremstu röð og undirstrikar að með sterkum fyrirtækjum og samfélagslega ábyrgum rekstri er hægt að skapa verðmæti sem nýtast öllum.“

Brim gerir tilboð í kaup á öllu hlutafé í Lýsi hf

Formaður Verkalýðsfélags Akraness fagnar áformunum

Formaður Verkalýðsfélags Akraness fagnar áformunum