Samgöngustofa hefur sent eigendum 121 báts bréf þar sem afturkallað er haffærniskírteini þeirra frá og með í kvöld. Ástæðan er sögð; „ófullnægjandi skoðanir gúmmíbjörgunarbáta sem hafa áhrif á haffæri skips,“ eins og segir í bréfi til eins bátseiganda sem Skessuhorn hefur undir höndum. Í bréfinu segir jafnframt: „Samgöngustofa hefur í kjölfar ábendinga, framkvæmt úrtaksskoðanir á gúmmíbjörgunarbátum skipa sem þjónustaðir voru af Skipavík ehf. frá miðju síðasta ári. Samgöngustofa hefur eftirlit með starfsemi þjónustustöðva gúmmíbjörgunarbáta skv. ákvæðum reglugerðar um þjónustustöðvar gúmmíbjörgunarbáta nr. 588/2002. Samkvæmt frétt um málið á fréttveg Ríkisútvarpsins hefur þjónustuaðilinn sjálfur skilað inn starfsleyfi sínu eftir að málið kom upp.

Niðurstöður úrtaksskoðananna hafa leitt í ljós ófullnægjandi frágang á gúmmíbjörgunarbátum í vissum tilvikum og í þeim mæli að Samgöngustofa telur brýnt að bregðast við með tilliti til siglingaöryggis. Miðað við fjölda frávika, stærð úrtaksins og þá annmarka sem komið hafa í ljós telur stofnun sér ekki annað fært en að meta allar skoðanir félagsins á framangreindu tímabili ófullnægjandi og að skipin, sem sættu skoðun félagsins, séu óhaffær, sbr. 36. gr. skipalaga nr. 66/2021.“

Því hafa haffærniskírteini þessara báta verið afturkölluð frá og með klukkan 23 í kvöld, föstudaginn 19. september. „Útgerðir sem þurfa að vera með skip á sjó á komandi dögum og áður en skoðun gúmmíbjörgunarbáts fer fram geta haft samband við Samgöngustofu.“

Áður en nýtt haffærisskírteini verður gefið út skal fara fram skoðun á gúmmíbjörgunarbát skipsins og staðfesting að berast Samgöngustofu frá þjónustuaðila. Skoðunin skal framkvæmd af viðurkenndum þjónustuaðila. Skoðunin verður útgerð skipsins að kostnaðarlausu enda fari hún fram fyrir árslok 2025. Fram kemur í bréfi Samgöngustofu að ákvörðun þessi sé kæranleg til innviðaráðuneytisins og skal kæra berast ráðuneytinu innan þriggja mánaða frá því að viðkomandi var tilkynnt um ákvörðun þessa.