Sýningin Sjávarútvegur - Iceland Fishing Expo 2025 hófst í gær og lýkur annað kvöld. Blaðamaður Skessuhorns kíkti á sýninguna við opnun hennar. Ljóst er að mikill metnaður er hjá fyrirtækjum sem þjónusta íslenskan sjávarútveg og voru öll sýningarrými Laugardalshallarinnar fullnýtt enda löngu uppselt. Á sýningunni er 150 básum stillt upp en sýnendur eru fleiri því nokkrir deila básum. Þetta er í dag orðið stærsta sýning sinnar tegundar á Íslandi og spannar mjög breitt svið fyrirtækja með tengingu við sjávarútveginn og ekki síður fiskeldið. Erlendir framleiðendur eiga sína fulltrúa en íslenskt hugvit er engu að síður í forgrunni. Á sýningu sem þessa mæta erlendir gestir frá flestum heimshornum gagngert til að sjá þær lausnir sem hafa verið þróaðar og smíðaðar hér á landi.