Bæjarstjórn Stykkishólms hefur samþykkt samhljóða að hefja viðræður við Skipavík ehf. um samstarf við skipulagningu og uppbyggingu íbúðarhúsnæðis vestan Borgarbrautar í Víkurhverfi í Stykkishólmi.

Fyrr í mánuðinum auglýsti sveitarfélagið eftir áhugasömum aðilum til viðræðna um áðurnefnda uppbyggingu. Um er að ræða; „nýtt og fjölskylduvænt íbúðahverfi í mikilli nánd við náttúruna,“ sagði orðrétt í auglýsingunni. Þá kom fram að samkvæmt húsnæðisáætlun sveitarfélagsins sé mikil eftirspurn eftir húsnæði í Stykkishólmi og mikill áhugi og eftirspurn sé eftir því að flytja til Stykkishólms. Svæðið er um 24,1 hektari að stærð og samkvæmt núgildandi deiliskipulagi er gert ráð fyrir tveimur raðhúsum og þrettán einbýlishúsum.

Þá var einnig auglýst lóðin R1 í Vikurhverfi með þeirri forsendu að miðað verði við 600 fermetra íbúðahúsnæði með allt að fjórum íbúðum með bílskúrsheimild.

Samkvæmt auglýsingunni er gert ráð fyrir að umsækjandi annist og beri kostnað af gatnagerð, fráveitu og uppsetningu ljósastaura gegn því að gatnagerðargjald verði ekki innheimt. Sveitarfélagið mun síðan annast yfirborðsfrágang og gerð gangstétta. Ein umsókn barst og kom hún frá Skipavík. Fram kemur í samþykkt bæjarstjórnar að þar sem einungis ein umsókn hafi borist sé ekki þörf á sérstöku mati milli umsækjenda en bæjarráði var falið að meta almenn og sérstök hæfisskilyrði Skipavíkur ehf. Þá mælist bæjarstjórnin til þess að fulltrúar Skipavíkur fái sem fyrst tækifæri til þess að kynna áform sín og hugmyndir á sameiginlegum fundi bæjarráðs og skipulagsnefndar.

*Fyrirhugað byggingasvæði í Víkurhverfi. Teikning: stykkisholmur.is*

Ganga til samninga við Skipavík