Linda Vilhjálmsdóttir og Freyjukórinn verðlaunuð

Ljóðaverðlaun Guðmundar Böðvarssonar og Borgfirsk menningarverðlaun voru veitt í tólfta sinn í Reykholtskirkju síðastliðinn laugardag. Verðlaunahafar voru Linda Vilhjálmsdóttir ljóðskáld og Freyjukórinn, kvennakór sem starfaði hefur í Borgarfirði um langt skeið.

Dýrmætt svigrúm til að yrkja

Verðlaunin eru veitt á vegum minningarsjóðs Guðmundar skálds frá Kirkjubóli í Hvítársíðu og Ingibjargar Sigurðardóttur konu hans. Í erindi Ingibjargar Daníelsdóttur formanns sjóðsins kom m.a. fram að tilgangur hans sé tvíþættur, annars vegar að vekja athygli á og styðja við það sem vel er gert hvað varðar borgfirska menningu og hins vegar með því að efla ljóðagerð og vekja um leið athygli á ljóðum Guðmundar Böðvarssonar. Hún sagði ljóð hans eiga fullt erindi til samtímans; hann fjallaði oft um grundvallaratriði sem varða líf okkar hér á jörðinni. Hún tók einnig fram að Ingibjörg Sigurðardóttir eiginkona hans hafi átt stóran þátt í afrekum hans, ekki síst væri mörg af fegurstu ljóðunum ort til hennar og jafnframt væri ljóst að hún hafi veitt honum visst svigrúm frá daglegu amstri.

Linda Vilhjálmsdóttir

Það þarf ekki að kynna Lindu Vilhjálmsdóttur fyrir ljóðaunnendum, en Safnið – Ljóð Lindu Vilhjálmsdóttur er heildarútgáfa á ljóðum hennar sem Mál og menning gaf út 2024 og fyrir það hlaut hún verðlaunin. Það er stjórn menningarsjóðsins sem tekur ákvörðun um úthlutun verðlaunanna hverju sinni, ekki er formlega kallað eftir tilnefningum. Í rökstuðningi Steinunnar Jóhannesdóttur á vali á verðlaunahafa segir m.a. að Safnið sýni afar vel hvernig skáldskapur Lindu hafi þróast á rúmlega 30 ára ferli og myndi nær órofa heild. Hún hafi snemma verið búin að finna frásagnaraðferð sína og stíl og takist á við krefjandi aðstæður í lífinu; skoði og greini af innsæi og skarpskyggni, jafnt hið persónulega, pólitíska og samfélagslega.

Freyjukórinn

Í framsögu Jóns Gíslasonar stjórnarmanns minningarsjóðsins kom fram að starf Freyjukórsins væri líflegt og öflugt og styrkir stjórnendur komið að starfseminni gegnum tíðina. Kórinn hafi borið gæfu til að velja sér metnaðarfull viðfangsefni og innan hans væri að finna hæfileikakonur sem ekki víluðu fyrir sér að þýða söngtexta og fella að lagi eða semja nýja. Ingibjörg Kristleifsdóttir er formaður kórsins og nefnir hún sérstaklega tvær konur í þessu sambandi, þær Þóru Geirlaugu Bjartmarsdóttur frá Norður Reykjum og Þórdísi Sigurbjörnsdóttur frá Hrísum.

Að sögn Ingibjörgu Daníelsdóttur var stundin í Reykholtskirkju ánægjuleg. Hún þakkaði húsráðendum þar fyrir góða umgjörð og sagði að verðlaunahafar hefðu þakkað fyrir sig á áhrifaríkan hátt og gert stundina góða og eftirminnilega. Ármann Bjarnason bóndi á Kjalvararstöðum las á samkomunni ljóð eftir skáldið frá Kirkjubóli.

**Rómuð bók Silju Aðalsteinsdóttur Skáldið sem sólin kyssti, kom út árið 1994 og hlaut Íslensku bókmenntaverðlaunin það ár.**

Minningarsjóður Kirkjubólshjóna veitir verðlaun

Linda Vilhjálmsdóttir og Freyjukórinn verðlaunuð

Linda Vilhjálmsdóttir og Freyjukórinn verðlaunuð