Byggðarráð Borgarbyggðar telur að gæta þurfi þess sveitarfélög lendi ekki í fjárhagslegum vítahring sem þau hafa lítið um að segja vegna fjárhagsaðstoðar til flóttafólks.

Þetta kemur fram í bókun ráðsins á fundi þess í gær þar sem rædd var fyrirhuguð sala á fasteignum í eigu Háskólans á Bifröst. Eins og fram hefur komið í fréttum Skessuhorns eru íbúar á Bifröst nú flestir flóttamenn frá Úkraínu sem notið hafa fjárhagsaðstoðar í ríflega tvö ár en þegar tvö ár eru liðin fellur fjárhagsaðstoðin á búsetusveitarfélagið.

Í bókun ráðsins kemur fram að í sumar hafi sveitarfélagið lagt kapp á að kynna þá áskorun sem við blasir á Bifröst meðal annars fyrir ráðherrum, sérfræðingum ráðuneyta, þingmönnnum, Vinnumálastofnun og Sambandi íslenskra sveitarfélaga. Mikilvægt sé að mati ráðsins að halda á lofti hagsmunum sveitarfélagsins og íbúa þess.

Ráðið telur að framlengja þurfi nú þegar heimild ríkissjóðs til að endurgreiða flóttamönnum fjárhagsaðstoð umfram tvö ár og sú heimild verði ótímasett. Þannig verði sveitarfélögum forðað frá því að lenda í fjárhagslegum vítahring sem þau hafa sjálf lítið um að segja.

Þá þurfi að hefja markvissa vinnu við að finna þorpinu á Bifröst nýtt hlutverk. Meginmarkmiðið við sölu á þorpinu verði að vera að þar byggist upp verðmætaskapandi starfsemi. Þá segir að við sölu þorpsins þurfi að taka tillit til sveitarfélagsins og samfélagsins í Borgarbyggð.

Einnig verði að „hefjast handa við að koma öllum þessum óvirka fjölda sem býr á Bifröst í virkni. Reynslan sýnir að það er ólíklegt að það gerist með áframhaldandi búsetu þeirra á Bifröst, fjarri atvinnumöguleikum og þjónustu“ segir orðrétt í bókun byggðarráðsins.

Ráðið segir að uppbyggilegt samtal sé í gangi við stjórnendur Háskólans á Bifröst og í samræmi við það bindi Borgarbyggð vonir við að hafa mun meiri aðkomu en hingað til að fyrirhugaðri sölu þorpsins á Bifröst.

Forða þurfi sveitarfélögum frá fjárhagslegum vítahring