Undir lok fundar Sólar til framtíðar, sem haldinn var á Hvanneyri í fyrrakvöld, var eftirfarandi ályktun lesin upp og send frá fundinum:

Fundur Sólar til framtíðar um vindorkumál haldinn á Hvanneyri 20. ágúst 2025 mótmælir harðlega fyrirhuguðum áformum um byggingu vindorkuvera á allt að fimm stöðum í Borgarfjarðarhéraði. Um yrði að ræða gríðarlega há og umfangsmikil mannvirki sem breyta myndu stórlega ásýnd héraðsins.

Sem kunnugt er býr Borgarfjarðarhérað yfir einstaklega mikilli náttúrufegurð, fengsælum veiðiám og vötnum, sem nýtt eru af fjöldamörgum innlendum sem erlendum veiðimönnum; öflugum landbúnaði og frístundabyggðum vítt og breytt um okkar fallegu sveitir. Upplifun fólks sem nýtir þessi gæði mun ekki verða söm ef við blasa himinháar vindmyllur nánast hvert sem litið verður.

Fundurinn átelur mjög tillögu Jóhanns Páls Jóhannssonar umhverfis,- orku- og loftslagsráðherra um að færa virkjanahugmynd um vindorkuver í Garpsdal í Reykhólasveit úr biðflokki í nýtingarflokk þvert á niðurstöðu og tillögu verkefnisstjórnar rammaáætlunar, sem byggir á faglegu mati, og það áður en sett hefur verið ný og nauðsynleg lagaumgjörð um orkuöflun með vindi. Sérlega alvarlegt er að ráðherra skuli færa virkjunarhugmynd úr biðflokki í nýtingarflokk gegn tillögu fagfólks. Tilfærslan jafngildir að ráðherra tekur afstöðu með einkaaðilum í orkuöflun og gegn náttúruvernd. Með þessu gönuhlaupi hefur ráðherrann hrundið „vindmylluboltanum“ af stað og ómögulegt er að sjá fyrir hvar hann muni stöðvast.

Það er skoðun fundarmanna að í bráð og lengd muni það best þjóna hagsmunum héraðsins okkar að engin vindorkuver verði byggð hér. Rökin gegn þeim eru mörg. Stærstu umhverfis- og samfélagslegu áhrifin eru sjónræns eðlis, en einnig má nefna gríðarlegt jarðrask við byggingu þeirra, hljóðmengun, plastmengun frá slitnandi spöðum, fugladráp og hugsanleg neikvæð áhrif á atvinnulíf héraðsins og verðgildi fasteigna.

Með hliðsjón af framansögðu er skorað á sveitarstjórnir í héraðinu, sem bera ábyrgð á skipulagsmálum, að hafna öllum áformum um vindmylluver. Vegna víðáttumikilla sjónrænna áhrifa frá háum vindmyllum er það krafa fundarins að sveitarfélögin veiti engar heimildir til að reisa slík mannvirki án samþykkis íbúa á áhrifasvæði þeirra í almennum íbúakosningum. Fundurinn var haldinn af Sól til framtíðar, sem er óháð grasrótarhreyfing í umhverfis- og náttúruverndarmálum. Starfssvæði samtakanna er Borgarfjörður, Mýrar og Hnappadalur að Haffjarðará.“

Ályktun fundar Sólar til framtíðar um vindorkumál