Eftir fremur milt sumar á landinu öllu er berjaspretta víða góð. Þó er alls ekki hægt að ganga að því vísu að ber sé að finna á öllum þekktum stöðum. Þar getur svo margt spilað inn í. Til dæmis skiptir það miklu máli fyrir vöxt aðalbláberja að lyngið hafi legið undir snjó veturinn áður, gjarnan í brattlendi og lautum. Þá er þekkt að hvassviðri að vori eða snemmsumars getur feykt blómunum af lynginu, sætukoppunum, sem þá ná ekki að mynda ber. Norðan hvassviðri í byrjun júnímánaðar í sumar liggur undir grun um að hafa haft áhrif í okkar landshluta.