Í gær luku verktakar á vegum Isavia lagningu nýs slitlags á flugvöllinn á Stóra-Kroppi í Borgarfirði. Nú er unnið að þjöppun slitlagsins og að því loknu verður flugvöllurinn opinn umferð.

Flugvöllurinn á Stóra-Kroppi á sér langa sögu. Hann er um 700 metrar að lengd og hefur í gegnum tíðina gegnt mikilvægu hlutverki þó mismikið hafi það verið í gegnum tíðina. Með bættum samgöngum á landi hefur flugvöllum í rekstri á landsbyggðinni fækkað mikið. Völlurinn á Stóra-Kroppi hefur þó haldið stöðu sinni og gegnir í dag mikilvægu hlutverki í kennsluflugi ekki síst á höfuðborgarsvæðinu þar sem kennsluflug á Reykjavíkurflugvelli hefur átt í vök að verjast. Hefur flugvöllurinn á Stóra-Kroppi því í auknum mæli verið nýttur til æfinga í flugtökum og lendingum.

Slitlag var fyrst lagt á völlinn árið 2004 og var það orðið afar slitið og götótt en nú hefur verið úr því bætt. Við flugvöllinn eru nú sex flugskýli í einkaeigu áhugaflugmanna í Borgarfirði og nokkrar flugvélar eiga þar sinn heimavöll ef þannig má taka til orða.

Snorri Kristleifsson á Sturlurreykjum þekkir völlinn manna best en hann hefur notað hann við flug frá árinu 1977 og reisti flugskýli við völlinn árið 1979. Í samtali við Skessuhorn segir hann mikið fagnaðarefni að nú skuli hafa verið ráðist í endurnýjun slitlagsins. Það hafi verið löngu tímabært enda muni mikilvægi vallarins að sínu mati aukast á næstu árum ekki síst þar sem kennslu- og einkaflug um Reykjavíkurflugvöll sé orðið þyrnir í augum margra íbúa í nágrenni vallarins. Að auki sé mikið öryggi fólgið í því að til staðar sé góður og öruggur flugvöllur eins og völlurinn á Stóra-Kroppi sé nú orðinn eftir þessar endurbætur.

Á myndinni má m.a. sjá flugskýlin sem byggð hafa verið á undanförnum áratugm við flugvöllinn.

Nýtt slitlag lagt á flugvöllinn á Stóra-Kroppi