Verkið ‘dwelling’ eftir Masaya Ozaki og Lilju Maríu Ásmundsdóttur verður flutt í Akranesvita á morgun, laugardaginn 16. ágúst kl. 18:00. Þau fá til liðs við sig flautuleikarann Berglindi Maríu Tómasdóttur, klarínettleikarann Bergþóru Kristbergsdóttur og víóluleikarann Þórhildi Magnúsdóttur.

‘dwelling’ er skapandi ferli í stöðugri þróun innblásið af reglulegum gönguferðum. “Grunnurinn að verkinu er byggður á gönguleiðum á milli heimila tónskáldanna í Reykjavík og á Seltjarnarnesi. Fyrir tónleikana í Akranesvita hafa þau aðlagað verkið og sækja innblástur til umhverfisins í kringum vitann en einnig hafa þau greint tíðnir sem óma vel í vitanum sjálfum. Á meðan á flutningi stendur verða grafískar nótur smám saman til úr bleki og bráðnandi klaka. Tónlistin þróast samhliða út frá því hvernig bráðnandi klakinn málar með blekinu.Hægt er að tryggja sér pláss á viðburðinn með því að hafa samband við Lilju Maríu í gegnum vefsíðu verkefnisins: www.liljamaria.com/dwelling

Miðaverð: Frjáls framlög (ráðlagt framlag: 2.500 kr.). Öll framlög fara til flytjenda. Fyrir þá sem hafa áhuga á að styrkja verkefnið verður hægt að kaupa málverk frá fyrri tónleikum og æfingaferlinu,” segir í tilkynningu.

Tónleikar í Akranesvita á morgun