Um næstsíðustu helgi fékk Leirlistafélag Íslands heimsókn þriggja keramikera frá Þýskalandi. Það voru þær Grit, Daniela og Evelyn, en þær voru sérstaklega forvitnar um íslenskan leir. Félagar í Leirlistafélaginu tóku sig til og skipulögðu leir-ferðalag og Vesturland varð fyrir valinu. Ferðin lá fyrst í Bjarnarfjörðinn á sunnanverðum Ströndum þar sem fræðst var um leirinn sem þar er í jörðu. Næst var ferðinni heitið á Eiríksstaðahátíð þar sem frumstæð holubrennsla var framkvæmd. Fyrst var grafin hola, sag var sett í botninn og svo leirmunir ofan á sagið. Því næst sett timbur yfir og kveikt í þar til kol mynduðust. Kúaskítur frá Erpsstöðum og þari og rekaviður af Ströndum var settur ofan á, til að fá appelsínugula tóna í leirmunina, svo var holunni lokað með þökum. Þessu var leyft að malla í um 20 klukkutíma en þá var gáð að útkomunni. Þær stöllur voru ánægðar með afraksturinn, fallegir appelsínugulir, svartir og hvítir litatónar birtust í leirmununum. Á næsta ári fara félagar úr Leirlistafélagi Íslands í leir-ferðalag um Þýskaland.