Vesturlandsliðin Víkingur Ólafsvík og Kári á Akranesi unnu bæði leiki sína í þrettándu umferð annarrar deildar knattspyrnu karla sem fram fór í gær.

Það voru Víðismenn í Garði sem sóttu Víking heim. Markús Máni Jónsson náði forystu fyrir gestina á 10. mínútu en Hektor Bergmann Garðarsson jafnaði fyrir heimamenn á 38. mínútu. Hektor Bergmann var að leika sinn fyrsta leik fyrir Víking eftir að hann kom þangað að láni frá ÍA í síðustu viku. Asmer Begic skoraði annað mark Víkings á 53. mínútu og Luke Williams það þriðja á 67. mínútu. Á 80. mínútu gerði fyrirliðinn Ingvar Freyr Þorsteinsson nánast út um leikinn þegar hann skoraði fjórða mark Víkings. Markús Máni skoraði síðan sitt annað mark fyrir Víði á 87. mínútu. Fleiri urðu mörkin ekki og úrslitin 4-2 sigur heimamanna.

Lið Kára á Akranesi hélt í Vogana þar sem þeir mættu liði Þróttar á Vogaídýfuvellinum. Sigurður Hrannar Þorsteinsson skoraði eina mark leiksins á 76. mínútu eftir að hafa komið inná af varamannabekknum skömmu áður. Finnbogi Laxdal Aðalgeirsson leikmaður Kára hlaut sitt annað gula spjald og þar með brottvísun á 4. mínútu uppbótartíma seinni hálfleiks.

Að loknum þrettán umferðum í annarri deildinni er lið Víkingi Ólafsvík í sjötta sæti deildarinnar með 19 stig. Lið Kára er í ellefta sætinu með 12 stig.

*Fyrirliðinn Ingvar Freyr Þorsteinsson fagnar marki sínu með liðsmönnum sínum. Ljósm. tfk.*

Góðir sigrar Vesturlandsliðanna í annarri deild