Í nótt hefur eldgosið á Sundhnúksgígaröðinni áfram verið stöðugt og virkni enn í tveimur gígum. Nú í morgun mælist gasmengun brennisteinsdíoxíðar ásamt gosmóðu á suðvestur horninu. Brennisteinsdíoxíð (SO2) mælist í magni sem er óhollt fyrir viðkvæma einstaklinga á höfuðborgarsvæðinu og á Akranesi. Samkvæmt heimildum Skessuhorns hafa íbúar á Akranesi margir fundið fyrir óþægindum í öndunarvegi og almennri vanlíðan síðustu daga. Rekja má það til slæmra loftgæða. Á það hefur verið bent að enginn loftgæðamælir er staðsettur á Akranesi og þykir nauðsynlegt að úr því verði bætt.

Síðdegis í dag bætir í vind og gæti það dugað til að minnka bæði mengun gosmóðu sem og brennisteinsdíoxíðar.

Af vef Umhverfis- og orkustofnunar loftgaedi.is um viðbrögð við SO2 mengun vefna eldgoss: „Farið með gát, fylgist með mælingum. Dragið úr áreynslu utandyra ef þið finnið fyrir einkennum. Ung börn eiga ekki að sofa úti í vagni. Eldri börn eiga ekki að reyna á sig utan dyra. Slökkvið á loftræstingu.“