Samkeppniseftirlitið heimilar kaup Orkunnar á Samkaupum

Samkeppniseftirlitið hefur nú fallist á kaup Orkunnar á Samkaupum. Félögin eru 68,3% í eigu Skel hf. og starfa á mörkuðum smásölu, bílaþjónustu og lyfsölu og hafa nú verið felld undir nýtt móðurfélag, Dranga hf. Í frétt Viðskiptablaðsins um sameininguna segir: „Í kjölfar samrunans afhentu fyrrum hluthafar Samkaupa 98,6% hlut í félaginu gegn afhendingu á 582,5 milljónum hluta í Dröngum, sem jafngildir 28,7% hlutafjár í félaginu. Aðrir hluthafar Samkaupa geta nú selt sína hluti á sömu kjörum og Dröngum er jafnframt heimilt að innleysa þá samkvæmt ákvæðum hlutafélagalaga.“

Umrædd félög reka fjölmörg vörumerki á neytendamarkaði. Orkan rekur 73 jarðefnaeldsneytis- og hraðhleðslu sjálfsafgreiðslustöðvar um allt land og þvottastöðvar Löðurs, einnig lyfjaverslanir Lyfjavals og Samkaup sem er ein stærsta verslanakeðja landsins með Nettó, Krambúðina, Kjörbúðina, Iceland, 10 – 11, Prís og netverslunina Heimkaup undir sínum hatti. Þjónustustöðvar félaga Dranga eru því alls 161 og eu þær að finna í öllum landshlutum. Tekjur félaganna sem verið er að sameina í nafni Dranga voru um 75 milljarðar á árinu 2024.

„Drangar stefna að einföldum, ódýrum og skilvirkum rekstri á öllum sínum starfseiningum. Áhersla verður á skýra ásýnd vörumerkja og gott úrval á vöru og þjónustu þar sem viðskiptavinurinn verður í fyrsta sæti. Stefnt er að bæði innri og ytri vexti félagsins og í framhaldinu að skráningu Dranga á skipulegan markað í Kauphöll á Íslandi fyrir árslok 2027,“ segir í tilkynningu. Auður Daníelsdóttir hefur verið ráðin í starf forstjóra Dranga en hún hefur leitt vegferð Orkunnar undanfarin ár og mun halda því áfram. „Skel hefur unnið undanfarin ár að þróun og mótun á öflugu fyrirtæki á smásölumarkaði sem væri verðugur keppinautur þeirra tveggja risa sem starfa á þeim markaði,“ segir jafnframt í tilkynningu vegna samrunans.

Drangar hf. orðið stórveldi í smásöluverslun hér á landi

Samkeppniseftirlitið heimilar kaup Orkunnar á Samkaupum

Samkeppniseftirlitið heimilar kaup Orkunnar á Samkaupum