Segir Kjartan Páll Sveinsson formaður Strandveiðifélags Íslands

Smábátasjómenn létu úr höfn í morgun eftir að Fiskistofa felldi niður öll strandveiðileyfi frá og með í dag. Kjartan Páll Sveinsson, formaður Strandveiðifélags Íslands, gerir út frá Grundarfirði og tók þátt í mótmælum ásamt nokkrum öðrum smábátasjómönnum. „Við vorum búnir að taka ís og gera allt klárt til að fara á veiðar í dag þegar þessi ákvörðun kemur eins og þruma úr heiðskýru lofti,“ segir Kjartan í samtali við Skessuhorn.

„Ég veit að það voru margir sem fóru á sjó í mótmælaskyni í morgun t.d. frá Patró, Ólafsvík, Akranesi og víðar.“ Kjartan Páll segir að þetta komi sér afar illa fyrir smábátasjómenn sem vonuðust eftir að geta klárað sumarið við veiðar, eins og fyrirheit höfðu verið gefin um. Einhverjir losuðu ísinn yfir borðstokkinn í morgun, sem þeir voru búnir að taka, enda nýtist hann ekki við veiðarnar í dag. „Þetta er alveg ómögulegt fyrir okkur og vonandi geta stjórnvöld komið einhverju skikki á þetta því þetta gengur ekki svona,“ segir formaður strandveiðisjómanna. „Við væntum þess að þetta verði lagað fyrir næstu strandveiðisumur. Ríkisstjórnin þarf að taka dagskrárvaldið af stjórnarandstöðunni og gera þetta almennilega í eitt skipti fyrir öll,“ sagði Kjartan Páll með þunga.

*Kjartan Páll Sveinsson á bryggjunni í Grundarfirði. Ljósm. úr safni/hig*

„Við væntum þess að þetta verði lagað fyrir næsta strandveiðisumar”

Segir Kjartan Páll Sveinsson formaður Strandveiðifélags Íslands

Segir Kjartan Páll Sveinsson formaður Strandveiðifélags Íslands