Kvikuhlaup hófst skömmu fyrir miðnætti á Sundhnúksgígaröðinni á Reykjanesi, en klukkan 23:55 hófst áköf skjálftahrina og mældist mikill fjöldi skjálfta næstu fjóra tímana. Borholugögn og ljósleiðari sýndu skýr merki um kvikuhlaup sem lauk með því að sprunga opnaðist og gos hófst skömmu fyrir klukkan fjögur í nótt. Sprungan var nú í morgun hátt í tveggja kílómetra löng en hún opnaðist milli Hagafells og Stóra-Skógfells. Kvikan rennur til suðausturs og er ekki talin ógna innviðum. Loftmengun frá gosinu er þó talsverð og leggur mökkinn yfir byggð í Vogum og Njarðvík þar sem íbúar eru hvattir til að hafa glugga lokaða.

Benedikt Ófeigsson jarðeðlisfræðingur hjá Veðurstofunni sagði í morgunfréttum RUV að um 500 til 700 rúmmetra af kviku á sekúndu væru að koma upp í þessu gosi. Það er um fjórðungur af því magni sem kom upp í gosinu fyrir ári síðan.

Þetta er níunda gosið á þessum slóðum en hið tólfta á Reykjanesskaga frá því að hrinan hófst með gosi við Fagradalsfjall í mars 2021.