Rarik undirbýr nú talsverða endurnýjun dreifikerfis hitaveitu sinnar í Dalabyggð. Gert er ráð fyrir að framkvæmdir deilist á 3-4 ár og kostnaður verði á fjórða hundrað milljónir króna. Í kjölfarið má búast við breytingu á gjaldskrá hitaveitunnar.

Rekstur hitaveitu í Dölum má rekja allt til ársins 1982 þegar gerður var kaup- og leigusamningur milli Laxárdalshrepps, Miðdalahrepps og Haukadalshrepps annars vegar og landeiganda Grafar í Miðdölum hins vegar. Þar seldi landeigandi Grafar hitaveituréttindi jarðarinnar og heimilaði jafnframt rannsóknar- og tilraunaboranir eftir heitu vatni. Rannsóknir og boranir hófust þó ekki fyrr en á árinu 1992 en framkvæmdakostnaður þá þótti of mikill.

Árið 1998 var málið skoðað að nýju og vorið 1999 var stofnfundur Hitaveitu Dalabyggðar haldinn og framkvæmdir við lagningu hitaveitu hófust í kjölfarið. Þeim lauk á árinu 2000 og hitaveitan var formlega tekin í notkun í desember það ár. Var þá áætlað að húshitunarkostnaður í Dalabyggð myndi lækka um 25-30% í kjölfarið.

Eftir nokkur ár í rekstri hófust umræður um mögulega sölu veitunnar þar sem sitt sýndist hverjum. Um tíma var rætt um að Orkubú Vestfjarða keypti veituna en niðurstaðan varð sú að árið 2003 keypti Rarik veituna og hefur rekið hana síðan.

Rúmlega 300 milljóna framkvæmd

Að sögn Óla Þórs Jónssonar rekstrarstjóra hitaveitna hjá Rarik hefur undirbúningur að endurnýjun staðið um nokkurn tíma. Hann segir að hin 24 km langa stofnæð veitunnar frá Gröf til Búðardals sé í góðu ástandi og flutningsgeta hennar næg. Dreifikerfi veitunnar sé hins vegar í verra ásigkomulagi. Upphafleg dreifilögn hafi verið lögð frekar grunnt og sé úr plasti með frekar lélegri einangrun sem valdi meira varmatapi en ásættanlegt sé. Rennsli hennar er um 13 sekúndulítrar af 86°C heitu vatni. Óli Þór segir að dreifikerfið hafi verið endurnýjað á stöku stað á undanförnum árum en nú hafi verið ákveðið að fara í endurnýjun af meiri krafti meðal annars vegna þess að stór notandi bætist við kerfið þegar framkvæmdum við sundlaug í Búðardal lýkur.

Þá segir Óli Þór að mikill sóknarhugur sé í Dölum og í því ljósi sé ekki síst mikilvægt að bæta dreifikerfið og tryggja að það mikla afl sem búi í borholunni í Gröf, um 3 Mw, komist sem best til skila til notenda. Reiknað er með að heildarkostnaður við framkvæmdirnar verði rúmlega 300 milljónir króna. Samhliða framkvæmdum verða breytingar á gjaldskrá til athugunar svo rekstur veitunnar verði í jafnvægi. Sú hækkun sem hugsanlega verði á gjaldskrám muni, að sögn Óla Jóns, endurspegla framkvæmdakostnað og þá hækkun hitastigs sem bætt dreifikerfi muni færa notendum.

Óli Jón segir undirbúning framkvæmdarinnar hafa gengið mjög vel og samstarfið við sveitarstjórnarmenn og íbúa í Dalabyggð hafi verið mjög gott. Hann vonast til að framkvæmdum ljúki á næstu þremur til fjórum árum.

Endurnýjun dreifikerfis hitaveitu í Dalabyggð að hefjast