core/paragraph

Fjáraukalög III, þar sem gerð var tillaga um þriggja milljarða aukafjárveitingu til neyðarviðgerða á vegkerfinu, voru loks samþykkt á Alþingi á laugardaginn. Þessarar aukafjárveitingar hefur lengi verði beðið enda líður hratt á þann tíma sem vænlegur er til slíkra framkvæmda.

G.Pétur Matthíasson forstöðumaður samskiptadeildar Vegagerðarinnar segir að starfsfólk Vegagerðarinnar hafi verið tilbúið og nú verði strax ráðist í útboð þar sem þau eru nauðsynleg, samið verði um einhver verk og tíminn verði að leiða í ljós hversu hratt gengur að koma verkum af stað. Öll verk sem búið var að undirbúa í útboð verði boðin út þó vissulega sé seint af stað farið nú.

Aðspurður segist hann reiknað með að tæplega 1,2 milljarði króna verði varið í framkvæmdir á Vestursvæði. Í tilkynningu frá innviðaráðuneytinu sem var að berast kemur fram að verkefnin dreifast um allt land en brýnasta viðhaldsþörfin er á Vesturlandi, Vestfjörðum og Suðurlandi, samkvæmt mati Vegagerðarinnar. „Á Vesturlandi og Vestfjörðum verður ráðist í fjölmörg verkefni. Þar má nefna sem dæmi viðgerðir á Vestfjarðavegi (t.d. Haukadalsá-Brautarholt og á kafla við Gröf), Barðastrandarvegi (t.d. Kleifarheiði og Raknadalshlíð), Útnesvegi og Bíldudalsvegi, þar sem íbúar hafa lengi kallað eftir úrbótum.“

Loks sagði G.Pétur að einnig verður ráðist í malbikun vegar um Bröttubrekku í stað klæðningar sem upphaflega voru áætlanir um.

Fréttaveita Vesturlands

Reiknað með 1.200 milljónum á Vestursvæði úr aukafjárveitingu