medium

large

thumbnail

1536x1536

2048x2048

small

custom-size

Fjórðungsmót Vesturlands fer vel af stað í rjómablíðu

Vetrarþjónusta boðin út í Borgarbyggð

Hlutfall erlendra ríkisborgara hefur nær tvöfaldast

Afhentu styrki af hagnaði Þorrablóts

Styttist í að nýtt parket verði lagt á íþróttahúsið

EuroBasket bikarinn kynntur í Kringlunni á morgun – laugardag

core/paragraph

Umhverfis-, skipulags-, náttúruverndar- og landbúnaðarnefnd Hvalfjarðarsveitar samþykkti fyrir sitt leyti á fundi sínum á miðvikudaginn að auglýst yrði tillaga að nýju aðalskipulagi sem gerir ráð fyrir nýrri höfn í landi Galtarlækjar í Hvalfirði. Endanleg ákvörðun um auglýsinguna bíður sveitarstjórnar Hvalfjarðarsveitar.

Líkt og kom fram í fréttum Skessuhorns í febrúar og mars ákvað sveitarstjórn Hvalfjarðarsveitar að auglýsa skipulagslýsingu hafnar við Galtalæk. Alls bárust 17 umsagnir og er óhætt að segja að þessar hugmyndir hafi fengið misjöfn viðbrögð. Má þar nefna ýmsa í næsta nágrenni Galtarlækjar, sveitarstjórn Kjósarhrepps og stjórn Faxaflóahafnar. Þá lýsti bæjarstjórn Akraness furðu sinni á því að Hvalfjarðarsveit, einn eigenda Faxaflóahafnar, skyldi stefna að nýrri höfn án samráðs við meðeigendur sína í Faxaflóahöfnum.

Á áðurnefndum fundi nefndarinnar á miðvikudagsinn var lagt fram erindi frá landeigendum Galtarlækjar þar sem lögð var fram tillaga að aðalskipulagsbreytingu í landi Galtarlækjar. Í erindinu segir að breytingin felist í nýju athafna- og hafnarsvæði vestan núverandi Grundartangasvæðis á rúmlega 100 hektara svæði. Gert er ráð fyrir að þar verði höfn með viðlegukanti sem nýtast muni til fjölbreyttrar hafnsækinnar starfsemi. Aðstæður á svæðinu eru sagðar hagstæðar til hafnargerðar einkum þar sem aðdjúpt sé á svæðinu. Því geti höfnin tekið á móti stórum skipum með mikla djúpristu.

Þá segir að skipulagssvæðið muni hýsa hreinlega og vistvæna starfsemi, svo sem vörugeymslur, geymslusvæði, léttan iðnað og þjónustustarfsemi tengda hafnarrekstri. Sérstök áhersla verði lögð á umhverfisvænar lausnir varðandi neysluvatn, fráveitu og raftengingar fyrir skip og bifreiðar, sem draga muni verulega úr útblæstri og mengun. Einnig verði lögð áhersla á starfsemi sem falli að hringrásarhagkerfinu, þar sem leitast verði við að hámarka nýtingu auðlinda og koma í veg fyrir úrgang í framleiðslukeðjum. Áhersla verði lögð á hreinlega starfsemi þar sem vel verði hugað að sjálfbærum lausnum á sviði innviða og auðlindanýtingar.

Þá kemur fram einnig fram í erindinu að unnið verði umhverfismat líkt og lög kveða á um vegna hafnarframkvæmda af þessari stærðargráðu.

Umhverfis-, skipulags-, náttúruverndar- og landbúnaðarnefnd Hvalfjarðarsveitar samþykkti fyrir sitt leyti með þremur atkvæðum Sæmundar Víglundssonar, Elínar Óskar Gunnarsdóttur og Guðbjarts Þórs Stefánssonar að tillagan að skipulagsbreytingunni yrði auglýst. Ása Hólmarsdóttir og Svenja Neele Verena Auhage sátu hjá við afgreiðslu málsins.

Það er hins vegar eins og fyrr segir sveitarstjórn Hvalfjarðarsveitar sem tekur endanlega ákvörðun um hvort aðalskipulagsbreytingin fari í auglýsingu. Næsti fundur sveitarstjórnar er samkvæmt dagskrá 13. ágúst nk.

Fréttaveita Vesturlands

Nefndin samþykkti að auglýsa aðalskipulag nýrrar hafnar í Hvalfirði