Á fundi í byggðarráði Dalabyggðar í dag var samþykkt bókun um vegamál og hún send á alþingismenn kjördæmisins og ráðherra. Í henni segir m.a. að; „ástand þjóðveganna hefur sjaldan verið eins slæmt. Hættan sem leiðir af ástandi veganna er algjörlega óviðunandi fyrir notendur. Á það jafnt við um íbúa, gesti, atvinnubílstjóra og neyðarflutninga. Jarðsig og frostskemmdir hafa gert veginn ósléttan yfirferðar, slitlag er gróft og bútakennt eftir áralangar holufyllingar, vegkantar eru víða brotnir og hafa gefið eftir á löngum köflum og víða eru vegir allt of mjóir. Á sumum stöðum, t.a.m. á brúm og ákveðnum vegaköflum er vatnsagi mikið vandamál.“

Þá segir í ályktuninni að sveitarstjórn Dalabyggðar hafi orðið tíðrætt um slæmt ástand vega í sveitarfélaginu á liðnum misserum og árum og hefur margsinnis gert athugasemdir við hættulegt ástand Vestfjarðarvegar (60) í gegnum Dali. Í febrúar á þessu ári sendu sveitarstjórnir á Vesturlandi ákall til forsætisráðherra og innviðaráðherra um að brýn þörf væri til að bregðast strax við bágbornu ástandi tiltekinna vegarkafla, með neyðarfjárveitingu í allra brýnustu viðgerðirnar, til að tryggja íbúum, atvinnulífi og ferðafólki lágmarks öryggi á vegunum.

Byggðarráð Dalabyggðar þakkar ráðherrunum fyrir að hafa brugðist hratt við ákalli sveitarstjórnarfólks á Vesturlandi og boðið til fundar 10. mars sl. þar sem tækifæri gafst til þess að ræða þessi mál. Í fréttum hefur komið fram að til standi að leggja viðbótarfjármagn í vegagerð, m.a. á Vesturlandi, með fjárveitingum gegnum fjáraukalög. „Ekkert liggur þó opinberlega fyrir um það hve mikla fjármuni eigi að leggja í endurbætur vega á Vesturlandi. Nú þegar júnímánuður er liðinn er ljóst að það verður æ erfiðara að nýta viðbótarfjármagn til framkvæmdaverkefna í vegagerð, þar sem drjúgan tíma þarf til að undirbúa verk, bjóða út og koma þeim af stað.“

Þá segir í ályktun Dalamanna að verulega aukin umferð, þar á meðal stórauknir þungaflutningar á síðustu árum, sumar sem vetur, kalli á aukin framlög til vegagerðar, ekki síst til almenns viðhalds. „Þó nýjar vegaframkvæmdir séu af hinu góða, þá má ekki gleymast að sinna viðhaldi eldri vega. Í þeim liggja mikil verðmæti sem fara forgörðum, sé viðhaldi þeirra ekki sinnt. Í febrúar sl. þurfti Vegagerðin að moka tjöru af „blæðandi“ þjóðvegum. Fjölmargir akandi vegfarendur urðu fyrir óþægindum og tjóni á ökutækjum sínum, vegna ástands þjóðveganna, þegar þykk tjara lagðist á hjólbarða og aðra fleti bifreiða. Slíkt er ekki einungis hvimleitt, heldur er umferðaröryggi stórlega ógnað í slíku ástandi, auk þess sem það veldur eigendum ökutækja fjárhagstjóni. Viðbúið er að slíkt ástand geti skapast aftur eins og ástand umræddra vega er.“

Loks ítrekar byggðarráð fjölmargar fyrri bókanir sínar um ástand þjóðvegar 60; „sem og annarra vega í Dalabyggð og Vesturlandi öllu og krefst þess að það verði stórauknu fjármagni varið til nauðsynlegra viðgerða og viðhaldsframkvæmda á Vestfjarðarvegi í gegnum Dali sem er sannkölluð vegæð inn á Vestfirði.“