medium

large

thumbnail

1536x1536

small

custom-size

Jakob Svavar og Kristín Eir efst í forkeppni fyrsta dags

2048x2048

Tjaldfylli á fyrstu tónleikum Írskra daga

Yfir tvö tonn af ufsa auk dagsskammts af þorski

Leirbakaríið opnað á nýjum stað á Akranesi

Fiskistofa með eftirlit úr lofti í júlí

Ný tilskipun ESB gæti aukið kostnað sveitarfélaga um 49 til 81milljarð

core/heading

<h2>Rætt við nýráðinn þjálfara karlaliðs ÍA í knattspyrnu</h2>

core/paragraph

ÍA er einn af risunum í knattspyrnu á Íslandi og á ýmsan mælikvarða þó víðar væri leitað. Saga félagsins var með litlum hléum samfelld sigurganga. Gengi liðsins hefur hins vegar dalað mjög undanfarin ár. Flakk milli deilda er ekki hlutur sem stuðningsmenn liðsins sætta sig við. Bara alls ekki. Til þess eru kröfurnar of miklar og þær kröfur eru byggðar á sögunni sem síðar varð að hefðinni. Allra síðustu ár mátti að margra mati sjá jákvæða þróun hjá liðinu. Í kjöfar árangurs liðsins í Bestu deildinni á síðasta ári þegar það náði fimmta sæti þótti flestum sem Eyjólfur væri nokkuð að hressast og því rétt að hækka árangursvæntingar þessa árs. En Adam var ekki lengi í þeirri Paradís.

Gengi liðsins það sem af er Bestu deildarinnar hefur ekki verið gott. Liðið hefur setið á botninum. Fleiri af sigursælum liðum íslenskrar knattspyrnu hafa heldur ekki staðist væntingar það sem af er. Á sama tíma hafa sum af svokölluðum minni liðum deildarinnar farið hamförum. Það kom því ekki sérstaklega á óvart að stjórn félagsins skyldi skipta um manninn í brúnni.

Fljótt voru ýmis nöfn nefnd til sögunnar í fjölmiðlum og í samtölum fjölmiðlamanna. Einn þessara fjölmiðlamanna sagði það skoðun sína að félagið ætti að ráða mann út tímabilið og meta svo stöðuna að því loknu. Á endanum má segja að þessi maður hafi verið tekinn á orðinu. Það sem meira er hann var sjálfur ráðinn í stöðuna.

core/image

<figure class="wp-block-image size-large is-style-default"><img src="https://umsjon.skessuhorn.is/wp-content/uploads/2025/07/Larus-Orri-snyr-aftur-heim-a-Skagann_2-1200x775.jpg" alt="" class="wp-image-92892" /><figcaption>Íbygginn þjálfari fylgist með sínu liði á sunnudaginn gegn Vestra á Kerecis-vellinum á Ísafirði. Ljósm. BerndsenPhoto</figcaption></figure>

Veit að verkefnið er stórt

Óhætt er að segja að ráðning Lárusar Orra Sigurðssonar hafi komið flestum á óvart. Ekki vegna þess að hann sé ekki þeim kostum búinn sem þarf í þetta starf heldur frekar vegna þess að hann hafði bara alls ekki verið nefndur sem mögulegur kostur í starfið góða.

Í aðdraganda fyrsta leik liðs ÍA undir stjórn Lárusar Orra mæltum við okkur mót í spjall og því lá beinast við að velta fyrir sér hvað hinn nýi þjálfari kæmi með í sínu farteski í starfið.  „Ég kem fyrst og fremst með áratuga reynslu bæði sem leikmaður og síðar sem þjálfari enda verið viðloðandi knattspyrnu nánast allt mitt líf.  Á mínum ferli hef ég reynt margt og þekki bæði að vera á sigurbraut og einnig að standa í erfiðri botnbaráttu. Síðast en ekki síst þekki ég aðstæður hér mjög vel eftir að hafa alist hér upp að hluta. Ég veit hversu stóran sess fótboltinn skipar í samfélaginu og veit hvaða kröfur eru gerðar til liðsins og árangurs þess. Ég veit að verkefnið er stórt og mikið og ég hlakka til að takast á við það. Það er líka gott að fá aðra sýn á hlutina þegar hlutir eru ekki að ganga eins og vonast var til.“

Mótaðist sem knattpyrnumaður á Akanesi

Lárus Orri flutti til Akraness á unga aldri frá Akureyri þar sem hann fæddist í Þorpinu. „Ég var hér allan minn grunnskólaaldur og mótaðist að talsverðum hluta hér sem knattspyrnumaður. Var mjög mikið í kringum pabba, Sigurð Lárusson, og þann sigursæla hóp sem hann spilaði með hér á sínum tíma. Ég þekki því umhverfið mjög vel. Þekki mjög mörg andlit og á héðan mjög ljúfar minningar sem urðu mér ennþá mikilvægari þegar pabbi féll frá frekar snögglega á besta aldri. Hér á ég því talsverðar rætur ekki síst í knattspyrnunni.“

Fótboltinn jafn mikilvægur og áður

Eins og áður sagði eru ávallt gerðar miklar kröfur þegar knattspyrnan á í hlut á Akranesi. Er hún áþreifanleg? „Ég upplifi ekki í sjálfu sér pressu vegna stöðu liðsins en ég finn þungann og alvöruna í þessu mikilvæga starfi og ég mun leggja mig allan fram við að ná árangri fyrir Skagann. Tíminn verður svo að leiða í ljóst hvernig það fer.

Eftir þessa fáu daga sem liðnir eru frá því að ég tók við starfinu finnst mér fótboltinn vera jafn mikilvægur og hann var þegar ég ólst hér upp á sínum tíma. Raunar fann ég mikinn mun þegar ég flutti héðan og norður til Akureyrar. Hélt að fótboltinn skipaði alls staðar sama sess og hér en það var öðru nær. Við getum orðað það svo að Akureyringar hugsi um fleiri hluti. Á þeim rúmu 30 árum sem liðin eru síðan ég flutti héðan átti ég minn feril með Þór bæði sem leikmaður og þjálfari, ég spilaði sem atvinnumaður erlendis um árabil og ég spilaði sem landsliðsmaður. Þrátt fyrir allan þennan feril hefur Skaginn alltaf skipað stóra sess í mínu lífi. Ég náði síðan óvænt að enda feril minn sem knattspyrnumaður í gulu treyjunni á sínum tíma og það var mjög ljúft og gott.“

Sannleikurinn er bestur

Nú geymir saga knattspyrnunnar nöfn margra þjálfara og hver og einn þeirra með sinn persónuleika. Þó ekki sé það vísindalega sannað hafa margir þeirra talist vera afar ákveðnir persónuleikar og gengið fram margir hverjir af talsverði hreinskilni og festu. Hvernig skyldi nýi þjálfarinn vera?

„Það er nú annarra að segja til um hvernig persónuleiki ég er og hvort ég er mjúk eða hörð týpa. Trúi því samt að ég hafi þroskast með árunum. Hafi lært að stundum geti verið betra að stíga skref til baka og íhuga málin í stað þess að stökkva á ákvörðun sem síðan er erfitt að breyta. En stundum koma upp atvik þar sem lítill tími er til umhugsunar og við því er ekkert að gera. Ég er í grunninn ákveðinn og hreinskilinn persónuleiki. Það er mjög mikilvægt í þessu starfi sem öðrum að koma framan að hlutunum og segja satt. Þannig farnast manni best. Sannleikurinn getur oft verið erfiður en þegar öllu er á botninn hvolft er hann bestur.

Það er líka mikilvægt að horfa gagnrýnum augum á sitt eigið starf. Ég tók, sem þjálfari hjá Þór í fimm ár, þátt í en byggja liðið upp að nýju. Þá voru mjög erfiðir tímar og þröngt í búi og þessi vegferð með liðið tók mjög á. Þegar uppskeran var að nálgast fann ég að mögulega væri ég orðinn fyrir í þessari vinnu á lokasprettinum. Ég hætti því á miðju tímabili og aðstoðarmaður minn tók við liðinu. Hann kláraði verkefnið og lið Þórs komst í hóp þeirra bestu að nýju. Ég á mikinn þátt í þeim árangri sem náðist en þarna þurfti ég að taka erfiða ákvörðun og gerði það. Síðar kom ég aftur til Þórs og var þar tvö góð ár og saman náðum við góðum árangri. Ég hef þá reglu að fella enga dóma nema geta rökstutt þá fyllilega. Sama á við um þjálfunina. Þú verður að geta rökstutt fyrir leikmönnum þær ákvarðanir sem þú tekur hverju sinni.“

Breyttir tímar á Akranesi

Þegar þú ólst upp á Akranesi var liðið hér í fremstu röð og sannkallað stórveldi. Nú eru breyttir tímar. Hvað gerðist? „Hvers vegna Akranes hefur ekki verið sama stórveldið og það var áður vil ég ekki fella neina dóma um. Vil þó segja að á ákveðnu tímabili voru fengnir til félagsins leikmenn sem ekki stóðu undir því verkefni að koma liðinu í fremstu röð. Hins vegar finnst mér umgjörð félagsins á síðustu árum vera á mjög góðri leið. Bæði hvað rekstur varðar og faglega þáttinn. Félagið hefur á undanförnum árum mótað fjölda leikmanna sem hafa verið seldir erlendis og styrkt þannig mjög fjárhag félagsins. Því er ekkert sem segir að Skaginn geti ekki komist í fremstu röð að nýju. Niðursveiflan núna er óvænt og vonandi verður hún ekki til þess að liðið falli niður um deild. Takist verkefnið að halda liðinu uppi heldur bara áfram það uppbyggingarskeið sem að mínu mati hefur verið á allra síðustu árum. Það hefur verið talsverð umræða á undanförnum árum að landsbyggðarliðin eigi ekki lengur möguleika á því að skipa sér í fremstu röð. Ég er því ósammála. Með starfi eins og unnið er á Skaganum í dag á að vera hægt að komast í fremstu röð að nýju.“

Styðjum við bakið á leikmönnnum

Þú nefnir sölu á leikmönnum erlendis. Er það rétt stefna að héðan hverfi flestir þeir leikmenn sem skara framúr? Er hægt að eignast lið í fremstu röð á þann hátt?

„Það er alltaf takmarkið í starfi félaga eins og ÍA að móta leikmenn sem reynt geta fyrir sér erlendis. Félagið á að styðja við bakið á þeim leikmönnum sem bjóðast samningar erlendis. Það styrkir félagið og samfélagið hér að eiga leikmenn sem eru í fremstu röð í atvinnumennsku erlendis. Við eigum hins vegar ekki að móta leikmenn fyrir liðin hérlendis. Það hefur hins vegar gerst en að mínu mati eigum að halda okkar mönnum hér þar til þeir geta haldið erlendis. Við erum vonandi komin á þann stað að þurfa ekki að missa leikmenn í lið innan lands.“

Topp aðstaða á Akranesi

Aðstaða til knattspyrnuiðkunar á Akranesi hefur talsvert verið í umræðunni að undanförnu. Ekki síst eftir að upp komu hugmyndir um uppbyggingu heilsuhótels við Langasand og snúning aðalvallarins í því sambandi. Í kjölfarið varð mikil umræða um aðstöðuna og féllu stór orð. Fyrrverandi þjálfari liðsins orðaði það t.d. svo að aðalvöllurinn á Jaðarsbökkum væri handónýtur. Orð sem komu nokkuð á óvart. Hvernig metur nýr þjálfari aðstöðuna?

„Ég vil fyrst af öllu taka fram að ég lít ekki á það sem mitt hlutverk að blanda mér í íþróttapólitíska umræðum um íþróttaaðstöðu og framtíðarskipulag vallarmála. Í mínum huga eru við hins vegar með allt til alls hér hvað aðstöðu varðar. Við erum með topp aðstöðu. Auðvitað má alltaf gera betur. Mér finnst ekkert komi í stað góðs grasvallar. Alls staðar í heiminum eru grasvellir þungamiðja leiksins. Ég geri mér auðvitað grein fyrir hvar við erum á jarðarkúlunni þannig að við þurfum að hugsa þetta í lausnum. Vera með gervigrasvöll með lítilli stúku sem getur nýst á þeim tíma í byrjun keppnistímabilsins og síðan tekur alvöru grasvöllur við. Umræðan um grasvellina hefur á köflum verið mjög ósanngjörn. Þeir hafa verið talaðir niður og að þeir séu ekki framtíðin og þess vegna hefur viðhaldi þeirra hrakað. Á sama tíma hefur verið skipt reglulega um gervigrasið á þeim völlum með ærnum tilkostnaði.“

Stýrði ekki fyrsta leiknum

Nú vakti ráðning þín að vonum mikla athygli og ekki síst að þú stýrðir ekki fyrsta leiknum eftir ráðninguna, leiknum við Stjörnuna.

„Ráðning mín gerðist mjög hratt. Eftir á að hyggja hefði kannski verið réttara að bíða með að ganga frá ráðningunni þar til eftir leikinn við Stjörnuna. Þetta gerðist samt svona. Það hefði þó ekki undir neinum kringumstæðum verið rétt að ég hefði stýrt liðinu í þeim leik. Ég hefði ekki verið búinn að ná neinu sambandi við leikmenn eða aðra í kringum liðið á þeim stutta tíma. Við erum með flott þjálfarateymi sem var búið að undirbúa þann leik mjög vel eins og sást í fyrri hluta þess leiks.“

Það hefur einnig vakið athygli að við ráðningu þína er skýrt tekið fram að hún er til loka yfirstandandi tímabils. Er loku fyrir það skotið að þú verðir áfram með liðið ef vel gengur? „Fyrirkomulagið á ráðningu minni þ.e. einungis til loka tímabilsins er bæði gott fyrir mig og liðið. Það kemur svo í ljós hvernig þetta verkefni gengur. Ef það gengur vel þá setjast menn niður þegar dregur að lokum og fara yfir stöðuna. Ég er opinn fyrir báðum kostum. Annars vegar að ég verði bara út tímabilið og hins vegar, ef sú staða verður uppi í haust og menn meta það svo, að ég gæti komið til greina að vera áfram.“

Nú opnar sumargluggi leikmannaskipta 17. júlí. Er frétta að vænta þegar sá gluggi opnast? „Það voru menn til skoðunar í vetur sem ekki tókst að klára og ég veit að okkar menn hafa verið að skoða leikmannamarkaðinn undanfarið, bæði heima og erlendis. Vonandi náum við að styrkja okkur. Ég vil samt ekki fara nánar út í þá sálma nú.“

Liðið á að vera í betri stöðu

Þú ert því bjartsýnn? „Ég er bjartsýnn á komandi vikur og mánuði. Ef ég horfi yfir leikmannahópinn tel ég að liðið eigi að vera í betri stöðu. Hins vegar lýgur taflan aldrei hvað svo sem veldur því. Deildin er mjög erfið en ég er mjög bjartsýnn á að við getum komið okkur á betri stað,“ segir Lárus Orri Sigurðsson nýráðinn þjálfari að lokum.

Lið ÍA hélt til Ísafjarðar þar sem það mætti liði Vestra, sem átt hefur góðu gengi að fagna í Bestu deildinni. Raunar verið á þeim stað sem flestir hefðu viljað sjá ÍA, nefnilega í efri hlutanum og um tíma við toppinn. Lárus Orri stýrði liðinu því í fyrsta sinn á mjög erfiðum útivelli. Glöggir menn töldu sig sjá batamerki á liðinu og sigur hafðist. Það veit vonandi á gott.

<figure class="wp-block-image size-large is-style-default"><img src="https://umsjon.skessuhorn.is/wp-content/uploads/2025/07/Barattusigur-IA-i-fyrsta-leik-undir-stjorn-Larusar-Orra_2-1200x674.jpg" alt="" class="wp-image-92893" /><figcaption>Byrjunarlið ÍA móti Vestra í fyrsta leik liðsins undir stjórn nýs þjálfara. Ljósm. BerndsenPhoto</figcaption></figure>

Fréttaveita Vesturlands

Lárus Orri snýr aftur heim á Skagann