medium

large

thumbnail

1536x1536

2048x2048

small

custom-size

Tilboð í almenningssamgöngur undir kostnaðaráætlun

Kraftur í nýbyggingum í Borgarnesi

Gert klárt fyrir Hafnarfjall Ultra utanvegahlaupið

Á fjórða hundrað ungmenna hittast á Snæfellsnesi

Samþykktu kaup á nýjum dælubíl

Úrtaka Dreyra fyrir Fjórðungsmót

core/paragraph

Aukafjárveiting sú að fjárhæð þrír milljarðar króna sem ætlað er til neyðarviðgerða í sumar er ennþá óafgreidd á Alþingi. Málið hefur ekki komist á dagskrá þingsins. Innviðaráðherra kennir málþófi stjórnarandstöðunnar um. Vegagerðarmenn bíða í ofvæni enda líður hratt á þann þrönga tíma sem þeir hafa til viðhaldsframkvæmda í sumar.

Í grein sem Eyjólfur Ármannsson innviðaráðherra skrifaði hér á vef Skessuhorns í síðustu viku kemur fram að ríkisstjórnin hafi samþykkt að veita þriggja milljarða viðbótarframlagi til viðhalds á vegakerfinu á þessu ári. Í greininni segir innviðaráðherra að meðal framkvæmda sem ákveðið hefur verið að ráðast í séu m.a. úrbætur á Vestfjarðavegi og Útnesvegi.

Ekkert gert fyrr en fjárveiting er í höfn

Pálmi Þór Sævarsson svæðisstjóri Vegagerðarinnar á Vestursvæði segir að þrátt fyrir að undirbúningur að viðbótarframkvæmdum hafi staðið yfir um nokkurt skeið hjá Vegagerðinni sé engin staðfesting komin á aukafjárveitingu og fyrr en slík staðfesting berist sé ekki hægt að hefjast handa. Þá liggi ekki heldur fyrir hvernig umræddir þrír milljarðar skiptast á milli umdæma en hann vonast til þess að ekki minna en þriðjungur upphæðarinnar verði nýttur á Vestursvæði. Hann segir augljóst að betra hefði verið að fjárveitingin hefði legið fyrir nú þar sem framkvæmdatími til slíkra verkefna sé stuttur eða frá 1. maí til loka ágúst. Framkvæmdir í sumar muni nánast eingöngu beinast að styrkingu burðarlags og slitlags þeirra vegakafla sem valdir verða. Að mestu geti aukafjárveitingin nýst innan þeirra útboða sem þegar eru í vinnslu og þannig nýtist tíminn betur. Þegar hafi verið ákveðið að ráðast í endurbætur á um 6 km en viðbótarfjárveiting gæti bætt við um 12-15 km ef allt fer að óskum.

Þá séu einnig í undirbúningi viðameiri framkvæmdir á næsta sumri í tengslum við loforð ríkisstjórnarinnar um auknar fjárveitingar. Á Vesturlandi megi þar nefna veginn milli Erpsstaða og Haukadalsár og Snæfallsveg.

Gera ráð fyrir þriðjungi upphæðarinnar

Í samtali við Skessuhorn segir G.Pétur Matthíasson, forstöðumaður samskiptadeildar Vegagerðarinnar, Vegagerðina hafa gert tillögu að skiptingu væntanlegrar aukafjárveitingar og framkvæmdir undirbúnar með hliðsjón af því. Sumar þeirra framkvæmda þurfi að bjóða út og tíminn vinni ekki með þeim framkvæmdum. Aðspurður segir G.Pétur að samkvæmt tillögu Vegagerðarinnar megi reikna með að um þriðjungur upphæðarinnar fari til framkvæmda á Vestursvæði.  Frumvarp til fjáraukalaga III var afgreitt frá fjárlaganefnd til annarrar umræðu 18. júní en hefur ekki komist á dagskrá Alþingis síðan.

Vonast til snöggrar afgreiðslu

Eyjólfur Ármannsson innviðaráðherra segir gert ráð fyrir að nauðsynlegar viðhaldsframkvæmdir hefjist í sumar. „Nú liggur fyrir nefndarálit meirihluta fjárlaganefndar og málið er klárt til annarrar umræðu og svo atkvæðagreiðslu. &nbsp;Þessar framkvæmdir þarfnast lágmarks undirbúnings og það væri fráleitt ef stjórnarandstaðan stæði í vegi fyrir því að þessi fjárauki fái snögga meðferð. Það myndi einungis sýna erindisleysi flokkanna í stjórnarandstöðu ef þeir tefja fyrir bráðnauðsynlegum vegabótum, sem fá bróðurpartinn af fjármagninu í þessum fjárauka og samsvara um 25% aukningu miðað við fjármagnið sem hefur farið í viðhald vega á síðustu árum. Að þessu sögðu býst ég við skjótri meðferð þingsins – vonandi í vikunni - og að stjórnarandstaðan stuðli að því með okkur.“

Aðspurður hvers vegna málið hafi ekki komist á dagskrá Alþingis bendir Eyjólfur á að dagskrárvaldið og forgangsröðun mála sé í höndum forseta Alþingis en þetta mál sé eftir því sem hann best viti í algjörum forgangi. Það sé hins vegar málþóf í þinginu. „Stjórnarandstaðan er búin að taka Alþingi Íslendinga í gíslingu og það eru ólýðræðisleg vinnubrögð gagnvart meirihluta Alþingis og þjóðinni.“

Aðspurður um forgangsröðun einstakra viðhaldsverkefna segir innviðaráðherra að Vegagerðin hafi hingað til séð um að skipuleggja og framkvæma viðhaldsaðgerðir. Í samgönguáætlun hafi þannig aðeins verið birt ein heildartala fyrir viðhald vega fyrir landið allt. Forgangsröðun byggi á árlegu ástandsmati innviða sem Vegagerðin vinnur og meti þannig viðhaldsþörfina.

Fréttaveita Vesturlands

Aukafjárveiting til neyðarviðgerða í vegamálum óafgreidd hjá Alþingi