Svo virðist sem afar grimmur og ásækinn mávur herji nú á íbúa Akraness. Hann herjar ekki á matarleifar, eins og flestir slíkir, heldur á dýr og menn. Miklar og heitar umræður hafa skapast á samfélagsmiðlum um málið og margir sagt farir sínar ekki sléttar eftir kynni sín af mávnum.

Upphaf umræðunnar var færsla sem móðir skrifaði á Facebook í gærmorgun. Hún var á leið með dóttur sína á leikskóla og með þeim var heimilishundurinn. Áður en hún veit af ræðst mávur að hundinum og virtist ætla að nema hann á brott. Varð það hundinum til bjargar að móðirin gat sveiflað leikskólatösku dótturinnar í átt að mávinun og hvarf hann við svo búið. Nú skal engum álasað sem þessa frásögn les sem leiðir hugann að því hvort þarna sé ekki ýkjusaga á ferðinni. Svo er aldeilis ekki því fjöldi manns skrifar við færslu móðurinnar frásagnir af viðureignum sínum við, að því er virðist, sama mávinn.

Hlaupakona lýsir því hvernig hlaupatúr hennar endaði við árás mávsins. Karlmaður taldi sér borgið með því að flýja undir volduga trjágrein en það dugði ekki. Mávurinn sótti að honum þannig að hann rak vængendana næstum í hausinn á honum. Sá maður ætlar ekki framar á slóðir mávsins nema með varnarbúnað. Einn lýsir því að mávurinn hafi ráðist í hænsnabúr og einn síns liðs drepið þrjár hænur.

Smáhundaeigandi segir hund sinn hafa lent í mávaárás en með naumindum haft betur og fjaðrir séu útum allan garð. Þeim hundi verði haldið innandyra á meðan ástandið vari.

Margir velta fyrir sér hvað valdi grimmd mávsins eða mávanna eftir atvikum. Nefnt er að mávurinn gæti verið með unga í hreiðri á þaki í hverfinu. Annar íbúi í hverfinu nefnir að nágranni fóðri umræddan máv og fuglinn vilji einfaldlega sitja einn að veisluborðinu og gæti því svæðis síns með harðri hendi ef svo má að orði komast.

Fólki til bjargar eru nefndar ýmsar lausnir eins og að fólk láti af því að fóðra fuglinn og aðrar sem ekki teljast af mýkri gerðinni.

Nokkuð ljóst er þó af fjölda lífsreynslusagna fólks við Hagaflötina og næsta nágrennis að mávurinn fer sínu fram bæði gagnvart mönnum og málleysingjum.

Mannýgur mávur herjar á Skagamenn