Á síðasta ári var Hinseginhátíð Vesturlands og hinni rótgrónu Brákarhátíð í Borgarnesi slegið saman um sömu helgina og úr varð mikil gleðihátíð. Svo vel tókst til að sama fyrirkomulag verður upp á teningnum í ár. Hátíðin verður í ár haldin í Borgarnesi dagana 27.-29. júní.

Guðrún Steinunn Guðbrandsdóttir, ein af þeim sem dregur undirbúningsvagninn, segir samstarfið milli Hinsegin Vesturlands og Hollvinasamtaka Brákarhátíðarinnar í fyrra hafa gengið gríðarlega vel. Júní er alþjóðlegur pridemánuður og Brákarhátíð er ávallt haldin síðustu helgi þess mánaðar og því hafi legið beinast við að sameina krafta. „Það tekur mikinn tíma og orku að halda svona hátíðir og við vorum búin að vera á haus að halda okkar Pridehátíð og fannst tilvalið að leggja saman krafta okkar til að auðvelda vinnuna. Við erum öll sammála um að risastór hátíðarhelgi í Borgarnesi sé miklu skemmtilegri.

Eins og áður sagði gekk samstarfið mjög vel og því hafi verið ákveðið að halda því áfram í ár og undirbúningurinn gangi mjög vel. „ Við erum fimm í stjórn Hinsegin Vesturlands og sjáum við að mestu um undirbúning á okkar dagskrá og þau hjá Hollvinasamtökunum eru einnig fimm og sjá að mestu um undirbúning dagskrár Brákarhátíðar. Svo eru gríðarlega margir aðrir sem koma að með margvíslegri þátttöku. Bæði í að halda ákveðna viðburði, með framlögum, vinagreiðum og öðru slíku. Fyrir utan svo aðra viðburði sem fyrirtæki og hópar eru að bjóða upp á þessa helgi,“ segir Guðrún.

Hún segir reynt að halda í fasta liði sem hafa tekist vel en þó séu ávallt einhverjar nýjungar. Að þessu sinni megi nefna Hinsegin Barsvar sem verður á föstudagkvöldið í Grímshúsi. Aðspurð segir Guðrún eins og aðrir hafa orðið vör við bakslag í baráttu hinsegin fólks ekki síst transfólks. Orðræðan, útilokanir frá íþróttum og réttindi sem dregin hafa verið til baka segi sína sögu ekki síst kommentakerfi samfélagsmiðla.

„Trans fólk er núna að fá sömu orðræðu og ofbeldi yfir sig og samkynhneigt fólk fékk áður. Ég spyr bara hvar er samkenndin, virðingin og væntumþykjan? Það er enginn eins og það þurfa ekki allir að vera eins en við getum öll borið virðingu fyrir hvert öðru og það á ekki að plaga aðra hvernig ég eða þú erum, ég þarf ekki að skilja það en ég get verið kurteis og boðið virðingu fyrir því hvernig aðrir eru eða vilja vera. Við hjá Hinsegin Vesturlandi hvetjum fólk til að sýna trans fólki stuðning sem og öllu hinsegin fólki allan ársins hring og þá sérstaklega um komandi helgi. Verið hjartanlega velkomin í Borgarnes,“ segir Guðrún Steinunn Guðbrandsdóttir að lokum.

Undirbúningur Hinseginhátíðar og Brákarhátíðar í fullum gangi