Pálmi Þór Sævarsson svæðisstjóri Vegagerðarinnar á Vestursvæði segir í samtali við Skessuhorn að engin staðfesting hafi enn borist á aukafjárveitingu til vegagerðar á Vesturlandi, en vonast til þess að það verði fljótlega enda talsvert liðið á þann tíma sem hentugastur er til framkvæmda.

Í grein sem Eyjólfur Ármannsson innviðaráðherra skrifaði á vef Skessuhorns í morgun kemur fram að ríkisstjórnin hafi samþykkt að veita þriggja milljarða viðbótarframlagi til viðhalds á vegakerfinu á þessu ári. Líkt og fram kom í frétt Skessuhorns voru samþykkt fjáraukalög á Alþingi á dögunum þar sem þessi þriggja milljarða aukafjárveiting var samþykkt. Í áðurnefndri grein í Skessuhorni segir innviðaráðherra að meðal framkvæmda sem ákveðið hefur verið að ráðast í séu m.a. úrbætur á Vestfjarðavegi og Útnesvegi á Snæfellsnesi.

Pálmi Þór segir að þrátt fyrir að undirbúningur að viðbótarframkvæmdum hafi staðið yfir um nokkurt skeið hjá Vegagerðinni sé engin staðfesting komin á aukafjárveitingu og fyrr en slík staðfesting berist sé ekki hægt að hefjast handa. Ekki liggi heldur fyrir hvernig umræddir þrír milljarðar skiptast á milli umdæma en hann vonast til þess að ekki minna en þriðjungur upphæðarinnar verði nýttur á Vestursvæði.

Hann segir augljóst að betra hefði verið að fjárveitingin hefði legið fyrir mun fyrr þar sem framkvæmdatími til slíkra verkefna sé stuttur eða frá 1. maí til loka ágúst. Framkvæmdir í sumar muni nánast eingöngu beinast að styrkingu burðarlags og slitlags þeirra vegakafla sem valdir verða. Að mestu geti aukafjárveitingin nýst innan þeirra útboða sem þegar eru í vinnslu og þannig nýtist tíminn betur. Þegar hafi verið ákveðið að ráðast í endurbætur á um 6 km en viðbótarfjárveiting gæti bætt við um 12-15 km ef allt fer að óskum.

Þá séu einnig í undirbúningi viðameiri framkvæmdir á næsta sumri í tengslum við loforð ríkisstjórnarinnar um auknar fjárveitingar. Á Vesturlandi megi þar nefna veginn milli Erpsstaða og Haukadalsár og Snæfellsnesveg.

Engin aukafjárveiting í hendi til vegagerðar á Vesturlandi