„Ég er vægast sagt afar óhress með þá þjónustu sem Íslandspóstur er að veita okkur íbúunum í dreifbýlinu. Nú er útburður á pósti kominn niður í tvo daga í viku, en á því eru ítrekuð vanhöld að staðið sé við það,“ segir Arndís Erla Ólafsdóttir í Ásgarði í Dölum í samtali við Skessuhorn. Alla jafnan eiga þau að fá póst borinn út í póstkassann, sem staddur er á afleggjaranum, á miðvikudögum og föstudögum, en iðulega falli póstferð niður án þess að fyrir því séu gefnar skýringar. Þegar hún svo leiti svara um vanhöld á póstburði, sé fátt um svör hjá stofnuninni.