Á dögunum tók Unnur Guðmundsdóttir við rekstri Stúkuhússins Kaffi á Safnasvæðinu í Görðum á Akranesi. Hún vill ásamt því að færa Skagamönnum kaffi og með því, styðja við og efla Akranes sem barnvænt samfélag og segir þetta tvennt geta farið saman í rekstri hins fornfræga Stúkuhúss. Unnur segir í samtali við Skessuhorn að hún hafi í raun tekið mjög óvænt við rekstri hússins. Aðstæður fyrri rekstraraðila hafi óvænt breyst og í kjölfarið hafi hún leitt hugann að þessum rekstri og til að gera langa sögu stutta sé hún nú tekin við stjórn og stendur vaktina með þremur starfsmönnum sínum.