Fulltrúi Sjálfstæðisflokksins í sveitarstjórn Borgarbyggðar vill seinka niðurrifi sláturhússins í Brákarey, sem almennt eru kallaðar burstirnar þrjár, og telur það standa sveitarstjórn nær að eyða þeirri óvissu sem ríkt hefur hjá öðrum eigendum fasteigna í Brákarey vegna skipulagsmála.

Allt frá því að Borgarbyggð festi kaup á sláturhúsinu í Brákarey árið 2005 hafa verið uppi ýmsar hugmyndir um framtíðarskipulag eyjunnar. Þær hafa á undanförnum árum tekið á sig ýmsar myndir m.a. í framhaldi af hugmyndum um rammaskipulag frá Festi sem kynntar voru á íbúafundi fyrir réttu ári síðan. Fyrr á þessu ári sögðu fasteignaeigendur í Brákarey farir sínar ekki sléttar í viðtali við Skessuhorn. Sögðu þeir fá svör berast frá sveitarfélaginu um stöðu þeirra og þeir væru því í raun fastir í óvissu sem kæmi niður á verðmæti fasteigna þeirra.

Sveitarfélagið bauð út fyrr á þessu ári niðurrif hluta sláturhússins. Tekið var tilboði að fjárhæð 51,5 miljón króna. Er það niðurrif nýlega byrjað en komið hefur í ljós að það mun reynast örðugra en í upphafi var talið m.a. vegna mikillar magnaukningar í asbesti.

Á fundi byggðaráðs 26. maí var samþykkt með tveimur atkvæðum Davíðs Sigurðssonar og Guðveigar Eyglóardóttur að fela sveitarstjóra að hefja undirbúning að öðrum áfanga niðurrifs. Sigurður Guðmundsson sat hjá við afgreiðsluna. Byggðaráð tók málið aftur fyrir 5. júní og þá voru kynnt drög að fyrirkomulagi á öðrum áfanga sem fela í sér niðurrif þriggja bursta sláturhússins. Var málið samþykkt með atkvæðum Davíðs og Guðveigar en Sigurður greiddi atkvæði á móti.

Í bókun sem Sigurður lagði fram á fundinum kemur fram að ekkert knýi á að umrætt niðurrif fari fram í ljósi stöðu skipulagshugmynda um uppbyggingu. Rekstur sveitarfélagsins sé að auki í járnum og því verði að fjármagna þessar framkvæmdir með lántöku. Þá segir í bókun Sigurðar að meirihluti Framsóknarflokksins í sveitarstjórn Borgarbyggðar ætti frekar að beina sjónum sínum og kröftum í að ljúka samningum um uppbyggingu í eyjunni og eyða þeirri óvissu sem ómarkviss vinnubrögð meirihlutans hafi skapað hjá eigendum fasteigna og atvinnurekendum á svæðinu.

Í samtali við Skessuhorn segir Sigurður að í raun hafi óvissa ríkt í málefnum Brákareyjar frá því 2005 og þar sé ekki eingöngu við Framsóknarflokkinn að sakast. Hann segir að heildarkostnaðurinn við annan áfanga sé áætlaður að lágmarki um 50 milljónir króna og fjárhagsstaðan leyfi slíkar framkvæmdir ekki að svo stöddu. Það verði að hans sögn að forgangsraða við slíkar aðstæður. „Það eru í mínum huga ekki mjög ábyrg eða markviss vinnubrögð meirihlutans að ráðast í svo viðamiklar framkvæmdir án þess að búið sé að ákveða hvað rísa mun í staðinn og ekki síst þarf að vera forgangsatriði að eyða þeirri ómögulegu og óboðlegu stöðu sem uppi er í Brákarey bæði hjá atvinnurekendum og fasteignaeigendum þar.“

Meðfylgjandi myndir voru teknar í gær, miðvikudaginn 11. júní, en á þeim sést að niðurrif bygginga í fyrsta áfanga hefur gengið rösklega frá því framkvæmdir hófust í maí.

Ágreiningur um hversu fljótt verði gengið í niðurrif í Brákarey