Í Miðskógi í Dölum rís þessa dagana 860 fermetra bygging sem hýsa mun eldi kjúklinga. Þetta er annað húsið af þessari gerð sem rís á jörðinni á tveimur árum. Það eru hjónin Skúli Hreinn Guðbjörnsson og Guðrún Esther Jónsdóttir sem standa fyrir þessum framkvæmdum en þau hafa búið í Miðskógi í rétt tíu ár.

Fyrra eldishúsið var reist árið 2023 í kjölfar þess að þau hjón gerðu samning um eldi á 13.000 kjúklingum fyrir Reykjagarð og var það tímamótasamningur þar sem ekki hafði verið kjúklingaeldi í Dölum áður. Klak unganna fer fram á Hellu og er þeim ekið til eldis í Miðskógi. Sláturstærð ná fuglarnir á 33-34 dögum og er þeim þá ekið aftur á Hellu til slátrunar. Reykjagarður selur vöru sína undir vörumerkinu Holta-kjúklingur.

Eldið hefur gengið vel

Það voru talsverð tíðindi á sínum tíma þegar áðurnefndur samningur var gerður því Reykjagarður var þá að leita eftir samstarfi við bændur á Suðurlandi en þeim hjónum tókst að sannfæra stjórnendur Reykagarðs um að víkka sjóndeildarhringinn. Með stækkuninni verða því um 26.000 fuglar í eldi.

Skúli segir kjúklingaeldið í Miðskógi hafa gengið mjög vel. „Okkur hefur tekist að ná góðum árangri í þeim þáttum sem horft er til við eldið. Á síðasta ári var framleiðslan um 190 tonn og með nýja húsinu mun framleiðslan tvöfaldast sem veitir ekki af því markaður fyrir kjúklingakjöt er vaxandi,“ segir Skúli.

Nýja húsið er reist úr forsteyptum einingum frá Smellinn á Akranesi og þakið kemur frá Límtré-Vírneti í Borgarnesi auk þess sem starfsmenn Sjamma ehf. á Akranesi reisa húsið, en ábúendur í Miðskógi annast frágang þess. Skúli segir að stefnt sé að því að hefja rekstur í húsinu í byrjun næsta mánaðar.

Kvennabrekka tekin á leigu

Á svipuðum tíma og kjúklingaeldið hófst fyrir tveimur árum flutti dóttir þeirra hjóna Sunneva Hlín ásamt eiginmanni sínum Jóhannesi Erni Pálmasyni og þremur börnum þeirra í Miðskóg og starfa við búreksturinn. Þrátt fyrir tvöföldun framleiðslunnar nú þarf ekki að bæta við starfsfólki. Fjölskyldan í Miðskógi er með fleiri járn í eldinum en kjúklingaeldið því í fjósinu eru 60 mjólkandi kýr auk kálfa- og sauðfjárræktar. Til þess að efla mjólkurframleiðsluna tók Skúli og fjölskylda fyrir nokkru jörðina Kvennabrekku á leigu ásamt mjólkurkvóta jarðarinnar og bústofni. Á Kvennabrekku er 15 bása fjós. Skúli segist þó ekki ná fram fullri hagræðingu því lögum samkvæmt verði hann að reka áfram búið á Kvennabrekku þar sem um leigu er að ræða. Engu að síður styrki þessi leigusamningur búsetu í Miðskógi.

Fyrir nokkrum árum settu Skúli og Guðrún Esther á fót fullkomna kjötvinnslu þar sem þau reyna að verka það kjöt sem fellur til hjá þeim. „Við reynum eftir því sem tími gefst að verka og markaðssetja allt okkar kjöt enda mikil og vaxandi eftirspurn eftir vörum beint frá býli. Að auki leigjum við nágrönnum okkar aðstöðu í vinnslunni þar sem þeir geta verkað sitt kjöt til sölu á markaði.“

Hjónin í Miðskógi hafa ekki setið auðum höndum þau tíu ár sem liðin eru síðan þau tóku sig upp frá Akranesi og fluttu í Dalina. „Okkur hefur tekist vel til og sama má segja um aðra þá uppbyggingu sem á sér stað í Dalabyggð. Við höfum í sameiningu verið að styrkja stöðu okkar samfélags og hér ríkir bjartsýni,“ segir Skúli.

*Þessi mynd var tekin inni í fyrra eldishúsinu þegar það var tilbúið fyrir kjúklingana.*

*Skúli og aðstoðarmenn hans að störfum.*

*Horft eftir húsinu sem er 860 fermetrar, eins og fyrra húsið sem reis fyrir tveimur árum.*

Miklar byggingaframkvæmdir í Miðskógi í Dölum