Rætt við Ásmund Sigurjón Guðmundsson stýrimann, skipstjóra og útgerðarmann í Stykkishólmi

Ásmundur Sigurjón Guðmundsson er 44 ára gamalt ungmenni úr Stykkishólmi. Ási rær á Hönnu SH 28 og er á strandveiðum um þessar mundir. Einnig er hann stýrimaður á farþegaskipinu Baldri og hefur verið þar í um tvö ár. Skessuhorn náði að hitta á Ása á hlaupum en hann var á leið til Reykjavíkur að horfa á dóttur sína spila körfuboltaleik.

Sjórinn alltaf kallað

Hvernig var upphafið á sjónum? „Ég fór minn fyrsta túr á togara þegar ég var 16 ára. Þetta var á Runólfi SH 135 árið 1997 en við vorum þá að veiða karfa. Sjórinn hefur af einhverjum ástæðum kallað á mig frá því ég man eftir mér. Sem gutti hékk maður niðri á bryggju alla daga og var í kringum flotta karla sem leyfðu okkur að taka þátt í bryggjulífinu, en þar var alltaf eitthvað fjör í gangi,“ segir Ási.

*Ásmundur og sonur hans, Viktor Brimir, sáttir með aflann. Ljósm. ásg.*

Það hafa allar veiðar sinn sjarma

Ási nefnir að hann hafi í gegnum tíðina helst stundað togveiðar og netaveiðar. „Það hafa allar veiðar vinn sjarma. Ég hef ekki stundað veiðar síðan ég fór á Baldur, nema á sumrin þar sem ég er á handfæraveiðum. Lífsstíllinn að vera sjómaður er náttúrulega mikil óregla en eftir að ég byrjaði í ferjusiglingunum er vinnutíminn rútíneraðari og það er alveg hægt að venjast því að sofa á nóttunni,“ segir Ási en hvernig er týpískur dagur hjá útgerðarmanninum um þessar mundir? „Yfirleitt er farið snemma út á morgni og komið í land um miðjan dag, allt eftir því hvernig gengur. Á handfæraveiðunum er yfirleitt styttra að sækja fiskinn í maí en svo þegar á líður þarf að sækja hann lengra og þá verða dagarnir örlítið lengri,“ segir Ási.

Mótaði mann sem sjómann

En átti Ási einhverjar fyrirmyndir á sjónum þegar hann var yngri? „Ég get ekki tilgreint neinn einn, en framan af sjómannsferlinum var ég yfirleitt lang yngstur í áhöfninni, en ég var svo heppinn að vera umkringdur flottum körlum sem mótuðu mann sem sjómann,“ nefnir Ási, en hvernig myndi hann lýsa lífinu á sjónum, fyrir þá sem aldrei hafa stundað það starf? „Á sjónum þurfa menn að vera tilbúnir að ganga í öll verk. Það sem einkennir góða áhöfn er góður hópur sem vinnur að sameiginlegu markmiði, en markmiðið er skýrt,“ segir Ási.

Áhugi vaknað á garðyrkju og skógrækt

Tvö barna Ása, þau Viktor og Adda, hafa spilað í úrvalsdeild í körfubolta og eru frambærileg í íþróttinni. En er þá aðal frístundamál Ása íþróttir, eða eitthvað annað? „Eftir að testósterón framleiðslan fór að minnka hefur áhugi vaknað á garðyrkju og skógrækt,“ segir Ási og brosir. Að lokum spyr blaðamaður um draumalið sem Ási myndi taka með sér á sjóinn? „Ég get ómögulega valið skipstjórann, hef verið með mörgum mjög færum og góðum skipstjórum í gegnum tíðina. Þessir skipstjórar hafa allir haft góða kosti hver á sínu sviði. Get heldur ekki valið stýrimanninn en matráðurinn væri Viktor Brimir Ásmundsson, en eftir nokkur sumur á Griffin snúðum var samið við barnið um að sjá um nestið á Hönnunni gegn hærri skiptaprósentu. Þetta sumar fékk ég besta trillufæði sem ég hef kynnst. Barnið hætti þó að sjá um nestið árið eftir en ekki var hægt að ná skipta prósentunni til baka. Á dekkinu myndi ég vilja hafa Grímúlf sem er góður að velja bullþema dagsins og Kjartan Ella sem segir skemmtilega frá,“ segir Ásmundur að lokum.

Hægt að venjast því að sofa á nóttunni

Rætt við Ásmund Sigurjón Guðmundsson stýrimann, skipstjóra og útgerðarmann í Stykkishólmi

Rætt við Ásmund Sigurjón Guðmundsson stýrimann, skipstjóra og útgerðarmann í Stykkishólmi