Sjómannadagsblað Snæfellsbæjar númer 33 í röðinni er komið út. Efnið kemur úr ýmsum áttum og reynt að tengja það við Snæfellsbæ og aðrar sjávarbyggðir á Snæfellsnesi. Hugvekjuna í blaðið ritar biskup Íslands, frú Guðrún Karls Helgudóttir, og atvinnuvegaráðherra Hanna Katrín Friðriksson ávarpar sjómenn og aðra lesendur.

En að frekara efni blaðsins. Fyrst er minnast þeirra sjómanna úr Snæfellsbæ sem látist hafa við störf á liðnum áratugum. Safn- og varðskipið Óðinn sigldi vestur fyrir sjómannadaginn og úti á Ólafsvíkinni voru lesin upp nöfn þeirra sjómanna frá Snæfellsbæ og rós sett í sjóinn við hvert nafn. Stefán Jóhann Svansson vélstjóri úr Stykkishólmi segir frá sinni sjóferðasögu. Hann er fyrsti vélstjóri á hinu glæsilega uppsjávarskipi Heimaey VE 1 frá Vestmanneyjum.

Skemmtilegt viðtal Írisar Óskar Jóhannsdóttur í Rifi við góðan vin sinn Helga Óskar Guðjónsson fiskvinnslumann, frístundabónda og fv. sjómann en hann verður 80 ára í sumar.

Viðtal er við Sigjón Þórhallsson sjómann úr Ólafsvík. Hann byrjaði sína sjómennsku mjög ungur eða 14 ára og var þá búinn að ráða sig á farþegaskipið Gullfoss. Hann og kona hans Oddný Ólafsdóttir segja m.a. frá eldgosinu í Heimaey aðfararnótt 23. janúar 1973. Þau eru þá með fimm daga gamla dóttur og verða að yfirgefa eyjuna í skyndi. Seinna flytja þau til Ólafsvíkur og hafa búið þar síðan.

Þá er spjall við Sigurð Pétursson, mikinn aflamann og fyrrverandi skipstjóra á Má SH 127 frá Ólafsvík. Hann hefur búið í bæ á austurströnd Grænlands frá 1997. Hann er þar við veiðar og segir frá lífinu þar.

Grein er eftir Finn Kristinsson vélstjóra á Skagaströnd en hann tók að sér að vera eftirlitsmaður við smíði tveggja glæsilegra skipa fyrir Íslendinga, þeirra Breka VE og Páls Pálssonar ÍS. Skipstjóri á Breka er Ólsarinn Magnús Ríkharðsson og margar myndir fylgja.

Hjónin Ewa og Daniel Wasiewicz frá Póllandi fluttu til Ólafsvíkur árin 2001 og 2002. Þau eru búin að koma sér vel fyrir í bæjarfélaginu með sínum dugnaði og eljusemi. Þau hafa alltaf nóg að gera og segja upp og ofan af sinni veru.

Og ekki má gleyma skemmtilegum vísum Guðjóns Jóhannessonar bónda í Syðri -Knarrartungu. ,,Margt skeður á sæ“ er nafn á viðtali við Bárð Guðmundsson útgerðarmann í Ólafsvík. Þar segir hann frá því er hann fór ungur maður á síðutogarana. Þar skeði margt sem fór í reynslubankann hjá ungum mönnun og hann dregur ekkert undan. Margar fleiri greinar eru í blaðinu og þá er það skrýtt fjölda mynda, m.a. af áhöfnum margra skipa í Snæfellsbæ.

Blaðið er brotið um í Prentsmiðjunni Steinprenti í Ólafsvík og er 92 síður að stærð. Ritstjóri er Pétur Steinar Jóhannsson.

-fréttatilkynning

Sjómannablað Snæfellsbæjar komið út