Eftir þrjá tapleiki í röð í Bestu deild karla í knattspyrnu náðu Skagamenn sigri á ný í gær þegar þeir mættu Íslandsmeisturum Breiðabliks á Kópavogsvelli.

Leikurinn fór ágætlega af stað og liðin skiptust á að sækja. Fyrsta færi leiksins kom eftir rúmlega korters leik þegar Blikinn Kristófer Ingi Kristinsson átti skalla í þverslá Skagamanna og þeir stálheppnir að lenda ekki undir í leiknum. Fyrsta mark leiksins leit dagsins ljós eftir um rétt tæpan hálftíma þegar Viktor Jónsson skallaði knöttinn fyrir markið og Erik Tobias Sandberg náði að koma honum inn fyrir línuna af harðfylgi. Í kjölfarið gáfu gestirnir í og bættu við öðru marki sex mínútum síðar. Þá fengu þeir hornspyrnu, boltinn barst fyrir utan teig á Hauk Andra Haraldsson sem lyfti knettinum inn á teiginn og Ómar Björn Stefánsson náði að setja hann í netið. Fimm mínútum fyrir hálfleik kom síðan þriðja mark ÍA þegar Ómar Björn, eins og oft í leiknum, átti góðan sprett og lagði boltann út á Viktor í teignum sem þrumaði honum í markið. Staðan 0-3 fyrir ÍA og Blikarnir tóku miðju, fóru í sókn og þar braut Hlynur Sævar Jónsson klaufalega af sér í vítateignum og vítaspyrna dæmd. Úr henni skoraði Tobias Thomsen af miklu öryggi og smá spenna komin í leikinn á ný. Fjörinu var ekki enn lokið í fyrri hálfleik því undir lok hans var Ómar Björn heppinn að fá gult en ekki rautt spjald þegar hann gaf Valgeiri Valgeirssyni olnbogaskot við endalínuna sem lá óvígur á eftir. Staðan 1-3 í hálfleik og ansi óvænt staða miðað við hvar liðin voru stödd í deildinni.

Skagamenn voru síðan stálheppnir í blábyrjun seinni hálfleiks þegar þeir tóku miðju og Haukur Andri sendi fastan bolta til baka á Árna Marinó Einarsson í marki ÍA sem missti boltann undir sig og elti hann langa leið að stönginni og rétt framhjá. Fyrsta færi ÍA fékk Ómar Björn þegar hann slapp inn fyrir vörnina en Anton Ari markvörður varði vel frá honum og skömmu síðar fékk Viktor fínt færi en setti boltann framhjá. Á 67. mínútu fékk Blikinn Arnór Gauti Jónsson sitt annað gula og rautt eftir brot á Viktori og í framhaldinu fengu gestirnir fjölmörg færi sem ekki nýttust. Erik Tobías fékk eitt og Viktor þrjú sem á venjulegum degi hefðu öll endað í netinu en svona er þetta stundum. Á síðustu mínútu í uppbótartíma fékk Gísli Laxdal skallasendingu frá Viktori inn fyrir vörnina og hann kláraði færið vel í fjærhornið. Lokatölur 1-4 ÍA í vil og langþráður sigur þeirra gulkæddu eftir erfitt gengi undanfarnar vikur.

Víkingur er með fjögurra stiga forystu í efsta sæti Bestu deildarinnar með 20 stig, næst koma Vestri og Breiðablik með 16 stig og Valur er í því fjórða með 15 stig. Í neðri hlutanum eru ÍBV og KA í 7.-8. sæti með 11 stig, KR, FH og Afturelding eru með 10 stig í 9.-11. sæti og á botninum er ÍA með 9 stig.

Næsti leikur Skagamanna er á móti ÍBV á sunnudaginn á Elkem vellinum og hefst klukkan 18.

Sanngjarn stórsigur Skagamanna gegn Breiðabliki