Rætt við Aron Gauta Kristjánsson þjálfara Reynis Hellissands

Reynir Hellissandi spilar þriðja árið í röð í 5. deild karla í knattspyrnu í sumar en í fyrra endaði liðið í 8. sæti af níu í B riðli með níu stig úr 16 leikjum. Aron Gauti Kristjánsson hefur tekið við keflinu sem þjálfari liðsins en Ólafur Helgi Ólafsson verður aðstoðarþjálfari Arons Gauta í sumar. Reynir hefur spilað tvo leiki til þessa í deildinni, fyrst töpuðu þeir á móti Létti 1-9 og síðan 8-0 gegn Herði Ísafirði. Næsti leikur Reynis er næsta sunnudag þegar þeir taka á móti liði Uppsveita á Ólafsvíkurvelli. Blaðamaður Skessuhorns heyrði í Aroni Gauta í síðustu viku og spurði hann út í tímabilið.

Hvenær hófst undirbúningurinn fyrir tímabilið og hvernig gekk það? „Undirbúningurinn hófst í seinna fallinu eða í byrjun mars. Það hefði mátt byrja fyrr en það var ekki komin skýr mynd á hvernig leikmannahópurinn kæmi til með að vera fyrr en um það leyti. Við erum þar af leiðandi svolítið á eftir öðrum liðum hvað það varðar en það er komin góð mynd á hópinn núna og við gefum bara í.“ Hafa orðið miklar breytingar á liðinu frá síðasta tímabili? „Já, breytingarnar felast aðallega í því að við leggjum áherslu á að heimastrákar af Snæfellsnesinu sem eru á 2. flokks aldri fái stór hlutverk í sumar. En það er alltaf ákveðinn kjarni af eldri strákum sem er til staðar og markmiðið er að blanda þessum hópum saman og búa til skemmtilegt lið.“

*Þjálfararnir Aron Gauti og Ólafur Helgi.*

Markmiðið að spila sem ein heild

Hver eru markmið liðsins fyrir sumarið? „Markmiðin eru fyrst og síðast að hafa gaman og að njóta þess að spila fótbolta. Að ná upp stemningu og spila sem ein heild í hverjum einasta leik.“ En hvað er æfingahópurinn stór, hvaðan kemur hann og hvað æfið þið oft í viku? „Hann samanstendur af sirka 14-16 leikmönnum sem æfa þrisvar sinnum í viku. Þetta eru allt saman strákar alls staðar af nesinu og það eru í raun og veru allir velkomnir sem vilja koma og æfa fótbolta með okkur.“ Hvernig líst þér á deildina í sumar? „Það eru hörkulið í 5. deildinni. Að mínu mati eru neðri deildirnar á Íslandi sífellt að verða sterkari og gæðin færast alltaf neðar með hverju árinu. Flest liðin æfa vel og byggja á ungum og ferskum strákum sem eru í góðu formi.“

Leggjum áherslu á að hafa gaman

Hvað á aðallega að leggja upp í leikjunum í sumar? Fjör, mörk og gleði í fararbroddi? „Við leggjum fyrst og fremst áherslu á að hafa gaman og að leikirnir sem við spilum séu skemmtilegir. Auðvitað vilja allir keppnismenn vinna einstaka fótboltaleiki og það er ekkert öðruvísi hjá okkar strákum. En fyrir mitt leyti er ég ekki endilega að hafa allt of miklar áhyggjur af stöðutöflunni. Við viljum alltaf mikið af mörkum og almennu fjöri. Við vinnum að því að finna okkar einkenni sem lið og hlutverk hvers og eins í liðinu. Þegar það er komið eru okkur allir vegir færir.“

Eitthvað að lokum? „Ég hvet alla til að styðja við bakið á strákunum í sumar og mæta á völlinn. Við lofum taumlausri skemmtun. Áfram Reynir!“

„Við viljum alltaf mikið af mörkum og almennu fjöri“

Rætt við Aron Gauta Kristjánsson þjálfara Reynis Hellissands

Rætt við Aron Gauta Kristjánsson þjálfara Reynis Hellissands