Rætt við forsvarsmenn Ocean Adventures í Stykkishólmi

Árið 2016 stofnuðu þau Hreiðar Már Jóhannesson og Hulda Hildibrandsdóttir fyrirtækið Ocean Adventures. Bjóða þau nú upp á þrjár mismunandi ferðir með ferðafólk; Lunda-ferð, Sjóstanga-ferð og Flateyjar-ferð. Blaðamaður kemur sér niður að höfn í Stykkishólmi og sér þar að ferðafólk er komið niður að flotbryggjunni. Hjón frá Hollandi og vinir frá Bandaríkjunum eru spenntir fyrir að komast um borð í bátinn Bjarma 7643. Blaðamaður fær að fljóta með og fanga stemninguna. Hreiðar skipstjóri og Paulina stýrimaður taka á móti gestum og fara yfir öll öryggisatriði. „Við munum fyrst kíkja á nokkrar eyjar hér nálægt Stykkishólmi vegna þess hve mikil fjara er núna, en við munum svo sigla áleiðis út í Elliðaey,“ sagði Hreiðar áður en kveikt var á vél bátsins og siglt úr höfn.

*Hreiðar Már Jóhannesson bendir á selina sem sátu fyrir á skerinu Álsteini.*

Þórishólmi og Birgisklettur

Siglt var upp að Þórishólma en þar er að finna mikið af ritu en nokkrir lundar láta sjá sig 22 metra fyrir ofan áhugasamt ferðafólkið um borð. Hreiðar segir að báturinn muni komast aðeins nær lundanum þegar líður á ferðina en mikið magn af lunda er í eyjunum.

Siglt er yfir í Birgisklett en þar tekur á móti bátnum hljóð sem líkist því þegar blaðamaður ældi í sjóinn ásamt föður sínum, um borð í Akraborginni árið 1987. Í Birgiskletti var nefnilega að finna heilmikið af skarfi sem lét vel í sér heyra og framkallar æluhljóð, en Paulina stýrimaður kemur og bendir á að örlítið fyrir utan séu nokkrir landselir sem vöktu mikla athygli, en þær bandarísku höfðu verið á ferð í Staðarsveitinni, nánar tiltekið á ströndinni á Ytri-Tungu, en þeim fannst þessir við Birgisklett vera töluvert stærri og tóku því ógrynni af myndum.

*Ferðamenn sjá lunda uppi á Þórishólma.*

Hádegissker og út í Elliðaey

Hreiðar siglir bátnum af stað og erum við að nálgast skerið Álstein en á því eru nokkrar fyrirsætur og þrjár þeirra hoppa út í hafið en ein verður eftir. Hreiðar segist kannast við þessa fyrirsætu sem verður eftir vegna ljósa litsins sem er við augu selsins og nefnir að hér sé ávallt mikið af sel. Hann bendir síðan á að ferðalagið út í Elliðaey sé hafið en á leiðinni mun báturinn stoppa í smá stund og vonast hann til að sjá erni. Ferðafólkið uppveðrast þegar Hreiðar nefnir orðið örn – og gestunum varð að ósk sinni. Tveir ernir sátu uppi á hól þegar Bjarmi nálgaðist en fljúga upp og fara í sitt óðal. Stórt bros kemur á hollensku konuna en hún náði að smella af fallegum myndum og sýnir stolt afraksturinn. Hreiðar hringir í fuglasérfræðing til að láta vita af því hvernig ernirnir líta út og hvar þeir séu staddir með óðal sitt.

Elliðaey

Umhverfis Elliðaey eru mikilfenglegar stuðlabergssúlur og eiga ferðamennirnir fá orð til að lýsa umhverfinu, eru hreinlega heillaðir. Hreiðar siglir svo bátnum inn, drepur á vélinni og segir ferðafólkinu frá eyjunni. „Þessi eyja er í eigu ríkisins en hefur verið í umsjón sömu fjölskyldunnar síðan 1929,“ segir Hreiðar og heldur áfram: „Langafi minn byggði þennan vita og hér er ein mesta lundabyggð við Breiðafjörð en í fyrra voru hér yfir 5000 lundar sem hreiðruðu um sig,“ sagði Hreiðar og voru gestirnir yfir sig ánægðir með þessar upplýsingar.

Á leiðinni heim nefndi Hreiðar að þau væru að fara aðra ferð beint eftir þessa. „Við erum að taka á móti hópum sem voru búnir að bóka ferð með Særúnu í sumar. Það er algjör óvissa með þann bát en við vorum búin að spyrjast fyrir um hann en ekkert svar fengið til baka. Við bættum við okkur öðrum báti til að geta brugðist við þessu ástandi og munum fara að taka fleiri ferðir út í Flatey einnig. Bókunarstaðan hjá okkur í sumar er frábær og er því spennandi sumar framundan,“ nefnir Hreiðar þegar báturinn sest að bryggju í Stykkishólmi.

*Ernir við hreiður sitt á ónefndum stað á Breiðafirði.*

*Ferðamennirnir voru agndofa yfir stuðlaberginu í Elliðaey.*

*Hreiðar Már að segja frá tengingu sinni við Elliðaey.*

*Lundinn var að koma sér fyrir úti í Elliðaey.*

*Sjóstangveiðiferðir Ocean Adventure eru vinsælar. Ljósm. hmj*

Bókunarstaðan frábær og spennandi sumar framundan

Rætt við forsvarsmenn Ocean Adventures í Stykkishólmi

Rætt við forsvarsmenn Ocean Adventures í Stykkishólmi