Hagsmunasamtök landeigenda telja sig sniðgengin af Landsneti

Umsagnir bárust frá 13 stofnunum, auk Landsvirkjunar, og 13 landeigendum að auki þegar auglýst var eftir viðbrögðum við umhverfismatsskýrslu Holtavörðuheiðarlínu 1. Skipulagsstofnun fjallar í áliti sínu, sem birt er á heimasíðu stofnunarinnar, nokkuð um innsendar umsagnir annarra stofnana, en fjallar hins vegar nær ekkert um umsagnir sem bárust frá 13 landeigendum. Skipulagsstofnun gerir óverulegar athugasemdir við umhverfismatið og setur minniháttar skilyrði af sinni hálfu.

Í umhverfismatsskýrslu Landsnets eru kynnt áform um lagningu Holtavörðuheiðarlínu 1 frá tengivirki á Klafastöðum í Hvalfjarðarsveit að nýju tengivirki á Holtavörðuheiði allt að 90 km leið. Aðalvalkostur Landsnets er línuleið að lengstum hluta meðfram núverandi byggðalínu en leiðin víkur frá núverandi línuleið á fimm köflum en alls eru lagðir fram 12 valkostir á línuleið til umhverfismats. „Helstu markmið með lagningu Holtavörðuheiðarlínu 1 eru að bæta tiltæka afhendingargetu á öllum afhendingarstöðum á landinu með því að auka flutningsgetu byggðalínunnar og bæta afhendingaröryggi hennar með því að styrkja tengingar við afhendingarstaði á meginflutningskerfinu sem jafnframt eru tengipunktar við svæðisbundnu flutningskerfin,“ segir um markmiðið með framkvæmdinni.

Sendibréfa leikur

Lagning nýrrar háspennulínu frá Hvalfirði í Hrútafjörð hefur vakið upp hörð viðbrögð landeigenda í Borgarfirði, enda telja þeir samráð um línuleið ekki hafa verið til staðar. Eiríkur Blöndal, formaður Hagsmunasamtaka landeigenda í Borgarfirði vegna Holtavörðuheiðarlínu 1, segir að niðurstaða Skipulagsstofnunar sé vissulega vonbrigði, en komi í sjálfu sér ekki á óvart vegna þess að stofnunin leggi ekki sjálfstætt mat á forsendur og gögn, en reiði sig í einu og öllu á gögn Landsnets. Hann segir það einkennilegan leik að bjóða almenningi og hagsmunaaðilum að gera umsagnir við hinar og þessar framkvæmdir á vegum hins opinbera, en taka þær athugasemdir alls ekkert til skoðunar og enn síður til greina. „Niðurstaðan er einhvers konar sendibréfa leikur stofnana sem eru meira og minna undir hælnum á sínum ráðuneytum og hafi lítið svigrúm til að hafa skoðanir á framkvæmdum,“ segir Eiríkur. Bendir hann á að hinar ýmsu stofnanir hafi fjallað um hina ýmsu skapninga, svo sem fugla, grös, fiska og fleira, en algerlega skorti umfjöllun stofnana um hagsmuni íbúa sem verða fyrir þessari framkvæmd.

Landsnet segir í bréfi til landeigenda: „Næstu skref í verkefninu er áframhaldandi samtal við landeigendur á línuleiðinni um framkvæmdina og vinna með sveitarfélögunum að skipulags- og leyfismálum. „Við reiknum með að senda bréf til landeigenda í sumar þar sem við hefjum formlega samtal um samkomulag um landbætur vegna kvaðasetningar í þágu Holtavörðuheiðarlínu 1. Við erum um það bil hálfnuð að hitta landeigendur til að kynna nánar framkvæmdina fyrir þeim og vonumst til að ná á þeim sem við höfum ekki enn hitt á næstu vikum,“ segir í bréfi til landeigenda.

Samtökin sniðgengin

Eiríkur Blöndal segir að landeigendur í Borgarfirði hafi stofnað sín samtök en Landsnet kjósi að sniðganga þau en reyni með brögðum að fá einstaka landeigendur til að samþykkja lagningu línunnar. „Landeigendur hafa bent á hið augljósa að ríkið noti sitt eigið land undir væntanlega háspennulínu. Ég gagnrýni einnig að Landsnet neiti að afhenda samtökunum nauðsynleg gögn, svo sem gögn um nákvæma legu línunnar og vegslóða og gögn um þá samninga sem gerðir eru við landeigendur vegna landbóta og annarrar aðstöðu. Á kynningarfundi í Borgarnesi í vor kom fram að stjórnvöld gætu heldur ekki fengið þessar upplýsingar.“

Eiríkur segist undrast þolinmæði kjörinna fulltrúa gagnvart þessari leyndarhyggju. „Allir samningar eru leyndarmál, umsækjendur um störf forstjóra er leyndarmál og svo ætlar Landsnet að biðja umhverfis- og orkumálaráðherra að taka land eignarnámi um allan Borgarfjörð.“ Eiríkur segir að endingu að stjórn Hagsmunasamtakanna hafi nú þegar fundað með umhverfis- og orkumálaráðherra og bent á stöðu sem að hans mati sé algerlega óviðunandi.

Skipulagsstofnun gefur út álit sitt um Holtavörðuheiðarlínu 1

Hagsmunasamtök landeigenda telja sig sniðgengin af Landsneti

Hagsmunasamtök landeigenda telja sig sniðgengin af Landsneti