Í morgun var Bláfáninn dreginn að húni við Langasand á Akranesi, þrettánda árið í röð. Bláfáninn er alþjóðleg umhverfisvottun sem veitt er smábátahöfnum, baðströndum og þjónustuaðilum í sjávarferðamennsku fyrir árangursríkt starf að umhverfismálum. Meginmarkmið verkefnisins er að vernda lífríki haf- og strandsvæða, draga úr umhverfisáhrifum, bæta öryggi og efla umhverfisvitund. Bláfáninn er veittur þeim baðströndum sem uppfylla ákveðin skilyrði sem lúta að þáttum á borð við umhverfisfræðslu og upplýsingagjöf, vatnsgæðum, umhverfisstjórnun, öryggi og þjónustu. Bláfáninn er þannig tákn um góða frammistöðu í umhverfismálum og bætir ímynd og ásýnd þar sem hann blaktir við hún.