Víkingur Reykjavík og ÍA áttust við í áttundu umferð Bestu deildar karla í knattspyrnu á laugardagskvöldið og var viðureignin á Víkingsvelli. Aðstæður til knattspyrnuiðkunar voru með ágætum, tíu stiga hiti var en skýjað og smá gola.

Víkingur komst yfir á 9. mínútu þegar Valdimar Þór Ingimundarson átti fyrirgjöf á Helga Guðjónsson sem var á auðum sjó vinstra megin í teignum og hann sendi fastan bolta í fyrsta fyrir markið þar sem Stígur Diljan Þórðarson var mættur og potaði knettinum í markið. Fyrsta færi gestanna kom á 25. mínútu þegar Viktor Jónsson náði skoti sem fór í varnarmann og Viktor vildi fá víti en ekkert var dæmt og sóknin endaði á þrumuskoti frá Rúnari Má Sigurjónssyni sem fór rétt yfir markið. Víkingur bætti við öðru marki á 34. mínútu og það var alls ekki ólíkt því fyrra. Helgi fékk boltann á fjær eftir fyrirgjöf frá Valdimar og kom honum í netið og staðan 2-0, Víkingi í vil. Fjórum mínútum fyrir hálfleik barst boltinn til Rúnars Más sem lét vaða um 25 metra frá marki og þrumuskot hans endaði í stönginni. Skömmu síðar fékk Víkingur hornspyrnu og nánast allir útileikmenn þeirra voru í vítateig Skagamanna. Haukur Andri Haraldsson náði að pota boltanum úr teignum og tók á rás upp allan völlinn með varnarmenn Víkings á eftir sér en stakk þá af og sendi boltann framhjá Ingvari Jónssyni í markinu. Frábær sprettur hjá stráksa og staðan 2-1 í hálfleik.

Seinni hálfleikur fór rólega af stað en á 57. mínútu fengu Skagamenn færi þegar Viktor átti fyrirgjöf á fjærstöngina á Marko Vardic en skot hans fór framhjá markinu. Sex mínútum seinna skaut Stígur Diljan föstu skoti utan teigs sem small af innanverðri nærstönginni og alla leið á línunni yfir í hina stöngina og svo út. Þar sluppu gestirnir með skrekkinn og aftur tveimur mínútum síðar þegar Stígur Diljan var með boltann fyrir opnu marki en setti hann yfir markið. Víkingur fékk tvö færi með mínútu millibili þegar tæpar tíu mínútur voru eftir af leiknum sem Árni Mariní í marki ÍA gerði vel í að verja og heimamenn unnu að lokum sanngjarnan 2-1 sigur sem þýðir að Skagamenn verma botnsæti deildarinnar. Til að bæta gráu ofan á svart fékk Jón Þór Hauksson, þjálfari ÍA, sitt annað gula spjald eftir tuð og þar með rautt í uppbótartíma sem þýðir að hann verður í banni í næsta leik.

Staðan í Bestu deildinni er þannig að Víkingur er á toppnum með 17 stig, Vestri og Breiðablik eru í 2.-3. sæti með 16 stig, Valur og Fram eru með tólf stig þar fyrir neðan og KR, FH, Stjarnan og Afturelding eru í 6.-9. sæti með tíu stig. ÍBV og KA eru í 10-11. sæti með átta stig og á botninum er ÍA með sex stig.

Næsti leikur ÍA er á móti Breiðabliki næsta fimmtudag á Kópavogsvelli og hefst klukkan 19.15. Síðan er heimaleikur gegn ÍBV á sunnudaginn áður en deildin fer í tveggja vikna frí vegna landsleikjahlés.

Skagamenn í neðsta sæti eftir tap gegn Víkingi