„Við hjá Wildline höfum tekið við sölunni á veiðileyfum í Vatnasvæði Lýsu á Snæfellsnesi og erum spenntir fyrir komandi tímabili,“ segir Magnús Anton Magnússon. „Ég sjálfur hóf minn veiðiferil þarna og hef verið að veiða þetta svæði síðan ég var ungur drengur, marga daga á ári og þykir virkilega vænt um Lýsuna. Í fyrra fórum við af stað í það verkefni að bæta uppeldisskilyrði fyrir laxaseiðin með því að búa til seiðagarða og svo stefnum við á að hefja hrognagröft á komandi hausti. Veiðin í Vatnasvæði Lýsu er mjög fjölbreytt svo allir veiðimenn ættu að finna sér eitthvað sem þeim hentar. Hvort sem þú ert að stíga þín fyrstu skref í fluguveiði eða ert vanur veiðimaður. Silungsveiðin er frábær í júní og upp úr júlí eykst laxavonin, sérstaklega neðar á svæðinu. Laxinn dreifir sér svo þegar líður á haustið og hafa menn verið að fá hann alveg upp að Torfavatni.“