Vesturlandsliðin Víkingur Ólafsvík og Kári spiluðu í þriðju umferð í 2. deild karla í knattspyrnu um helgina. Víkingur fór í langferð austur en Kári lék á heimavelli í Akraneshöllinni.

KFA og Víkingur mættust í Fjarðabyggðarhöllinni á Reyðarfirði á laugardaginn og seinkaði leiknum um hálftíma þar sem flugi gestanna var frestað um tvo tíma. Það kom þó ekki í veg fyrir að leikurinn byrjaði fjörlega því tvö mörk litu dagsins ljós á fyrstu sjö mínútunum. Fyrsta markið kom eftir að Víkingur hafði tapað knettinum aftarlega á vellinum en Marteinn Már Sverrisson nýtti sér það og skoraði fyrsta mark leiksins fyrir KFA. Fimm mínútum síðar jafnaði framherjinn Kwame Quee metin fyrir Víking eftir gott uppspil sem endaði á því að fyrirgjöf Gabriels Þórs Þórðarsonar rataði til Kwame sem kláraði færið sitt vel. Lítið var um fleiri færi í fyrri hálfleiknum og staðan 1-1 þegar liðin fengu sér hressingu.

Það er óhætt að segja að það hafi verið stál í stál í seinni hálfleiknum og reyndar nánast allan leikinn. Varnir liðanna voru ansi þéttar og mikil stöðubarátta sem þýddi að leikurinn var kannski ekki mikið fyrir augað. Liðin fengu þó nokkur færi sem ekkert varð úr og gestirnir fóru heim sáttir með stigið enda á mjög erfiðum útivelli. Lokatölur urðu 1-1 og Ólsarar eru á góðum stað í deildinni með fimm stig og í fjórða sæti. Næsti leikur liðsins er næsta laugardag þegar þeir taka á móti Ægi á Ólafsvíkurvelli og hefst klukkan 14.

Kári tók á móti Gróttu í gær eftir að hafa spilað maraþonviðureign við Stjörnuna á miðvikudaginn í Mjólkurbikarnum sem endaði í framlengingu og vítaspyrnukeppni. Það var ekki að sjá í byrjun leiks að einhver þreyta væri í mannskapnum því á 17. mínútu voru Káramenn komnir yfir. Varnarmaðurinn Birkir Hrafn Samúelsson sendi þá langa sendingu yfir vörn Gróttu þar sem Máni Berg Ellertsson var á auðum sjó og vippaði boltanum snyrtilega yfir Skagamanninn Marvin Darra Steinarsson í markinu. Staðan 1-0 fyrir Kára en næsta markið lét ekki bíða lengi eftir sér. Sjö mínútum síðar jöfnuðu gestirnir eftir gott samspil sem lauk með því að Björgvin Brimi Andrésson fékk boltann í teignum, hann fór framhjá varnarmanni Kára og setti boltann undir Kristján Hjörvar Sigurkarlsson markmann Kára og í netið. Vel gert hjá kauða og í framhaldinu skiptust liðin á að sækja án þess þó að skapa sér mikið og einhver þreytumerki voru á leikmönnum Kára þegar líða tók á seinni hlutann, staðan 1-1 í hálfleik.

Gestirnir komust síðan yfir á 53. mínútu þegar Caden McLagan skoraði óvaldaður með skalla í fjærhornið eftir hornspyrnu þar sem Káramenn gleymdu sér stundarkorn og staðan 1-2, Gróttu í vil. Kári færði sig í kjölfarið enn framar á völlinn til að freista þess að jafna metin og afar umdeilt atvik átti sér stað á 60. mínútu. Sigurjón Logi Bergþórsson fékk þá sendingu inn fyrir vörn Gróttu, hann potaði boltanum yfir Marvin Darra sem sparkaði svo í Sigurjón Loga og hann féll við. Vel sést í útsendingu ÍATV að um brot var að ræða og Marvin hefði með réttu átt að fá beint rautt spjald en dómarinn var á öðru máli og dæmdi aukaspyrnu Gróttu í vil sem var alrangur dómur. Í framhaldinu færðist enn meira fjör í leikinn og mikið var um pústra og átök milli leikmanna sem leiddi af sér nokkur spjöld. Sigurjón Logi fékk ágætis færi á 73. mínútu en skalli hans fór yfir markið og hvað sem heimamenn reyndu að bjarga stigi þá náðu þeir ekki jöfnunarmarkinu. Á sjöttu mínútu í uppbótartímu vildu Káramenn fá vítaspyrnu þegar virtist brotið á Sveini Svavari Hallgrímssyni innan vítateigs en ekkert var dæmt og gestirnir fóru heim með stigin þrjú, lokatölur 1-2 í hörkuleik.

Tímabilið hefur ekki byrjað eins vel og til stóð hjá Kára en þeir hafa tapað tveimur leikjum á heimavelli og eru í 8.-9. sæti ásamt Kormáki/Hvöt með þrjú stig. Næsti leikur liðsins er á laugardaginn þegar þeir spila einmitt á móti Kormáki/Hvöt á Blönduósvelli og hefst viðureignin klukkan 16.

Sterkt stig hjá Víkingi en óvænt tap Kára